A borrasca Elsa impactou de cheo este mércores en Galicia, onde deixou ventos de 140 quilómetros por hora e choivas copiosas. A estación de Penedo do Galo, en Viveiro, rexistrou o refacho de vento máis intenso, a 138,2 km/h. En Xesteiras, en Cuntis, chegouse a 125 km/h, e en Cabo Udra e Ons tamén se superaron os 100 quilómetros por hora.
Como consecuencia, ata as 18.00 horas rexistráronse 376 incidencias en Galicia, a maioría por caídas de árbores e ramas, inundacións ou desprendementos en estradas.
Por provincias, A Coruña foi a máis afectada con 200 incidencias, seguida de Pontevedra con 136. En Lugo houbo 26 e en Ourense 14. Por municipios, o máis afectado foi Vigo, con 34 episodios. Elsa esnaquizou a rúa dedicada á película Frozen, un dos atractivos do Nadal da cidade.
Elsa tamén se fixo notar en Cangas, onde os fortes refachos de vento acompañadas de choiva provocaron a caída dunha parte da fachada dun edificio.
Na capital pontevedresa, 17 minutos durou o Pontevedra-Eivissa de Copa do Rei programado para este mércores en Pasarón. A choiva caída nas últimas horas condicionou por completo un choque ao que o colexiado deu comezo, pero que parou pouco despois do cuarto de hora pola auga que caía, que lle imposibilitaba, segundo confirmaron despois ambos os adestradores, ver con claridade as liñas do campo.
