O covid-19 rompe a tendencia do emprego e Galicia suma 8.252 parados en marzo

Segundo os últimos datos oficiais, 156.281 traballadores están afectados na comunidade por Expedientes de Regulación de Emprego (ERTE) 
 
Comercio pechado polo coronavirus. AIDA SOENGAS
photo_camera Comercio pechado polo coronavirus. AIDA SOENGAS
A pandemia do coronavirus e a consecuente alarma sanitaria e paralización case absoluta da actividade económica está a pasar factura ao mercado laboral e Galicia non se salva das devastadoras consecuencias, xa que 8.252 persoas pasaron a engrosar en marzo a lista de desempregados, un 4,96 % superior ao mes anterior.

O paro na comunidade autónoma galega alcanza as 174.481 persoas, 3.640 máis respecto de marzo de 2019, un incremento de 2,13 puntos en termos relativos, segundo os datos dados a coñecer este xoves polo Ministerio de Traballo e Economía Social.

Esta cifra non recolle, con todo, as consecuencias dos empregos que se perden de forma temporal ata que se levante o estado de alarma.

Por provincias, A Coruña rexistra 69.405 parados; Lugo, 17.053; Ourense, 19.322, e Pontevedra, 68.701 desempregados.

En canto aos sectores de actividade económica, do total de parados en Galicia, 5.950 son do sector agrícola, 19.045 do industrial, 14.443 da construción, 121.606 de servizos e 13.437 encádranse no apartado sen emprego anterior.

Segundo os últimos datos oficiais, 156.281 traballadores están afectados en Galicia por Expediente de Regulación de Emprego (ERTE) e as empresas cursaron 29.839 solicitudes para acollerse a este mecanismo, posto en marcha especialmente pola crise desatada polo Covid-19.

Respecto das afiliacións á Seguridade Social en Galicia no mes de marzo, alcanzou a cifra de 1.002.624 para o total do sistema, o que supón unha diminución respecto ao pasado mes de febreiro de 9.730 afiliacións (-0,96 %), por baixo do 1,26 % que se rexistrou a nivel estatal.

Na comparativa interanual (marzo de 2020 con marzo de 2019) obsérvase unha diminución de 1.781 afiliacións no total do sistema en Galicia (-0,18 %) e unha diminución do 0,19 % (36.816 afiliacións) no conxunto estatal.

Fontes oficiais sinalan que como consecuencia da pandemia do coronavirus, cuxo impacto comeza a apreciarse de forma notoria a partir do día 12 de marzo, o dato de afiliación media non reflexa "con rigor" o ocorrido no conxunto do mes.

A crise sanitaria e a suspensión temporal de actividades a raíz do estado de alarma traduciuse nunha subida do desemprego en todas as comunidades autónomas, en especial en Andalucía onde o paro aumentou ata un 17,18 %, case o dobre que a media do Estado, do 9,31 %.

As menores subidas déronse en Madrid (3,08 %) e Cantabria (4,55 %), ademais da cidade autónoma de Ceuta (1,57 %). A cidade de Melilla é o único lugar onde o paro descendeu en marzo e fíxoo nun 1,36 %, é dicir, 129 desempregados menos.

A ministra de Traballo, Yolanda Díaz, dixo este xoves en rolda de prensa que os servizos públicos de emprego (SEPE) autorizaron xa no conxunto do Estado 620.000 prestacións a traballadores incluídos en expedientes de regulación temporal de emprego desde que o Consello de Ministros aprobou o mecanismo de simplificación para dar resposta á crise do covid-19 ata hoxe.

Díaz reprochou a cinco comunidades autónomas, Galicia entre elas, falta de cooperación ao non facilitar á autoridade competente estatal os seus datos de Expedientes de Regulación Temporal de Emprego.

SINDICATOS. Os sindicatos galegos han reaccionado aos alarmantes datos do desemprego en marzo. Desde UXT-Galicia alúdese á prioridade de manter o emprego unha vez superada a crise sanitaria, para o que consideran "imprescindible" abordar a recuperación sobre unhas bases sólidas de futuro.

Para a central sindical dirixida na comunidade galega por José Antonio Gómez a protección por desemprego, con 69.000 persoas en Galicia sen ningún tipo de cobertura, segue sendo "insuficiente".

O secretario confederal de Emprego da CIG, Fran Cartelle, opina que a grave situación no mercado laboral vén determinada pola "insuficiencia e a tardanza nas medidas adoptadas polo Goberno do Estado xunto coa pasividade da Xunta, que condenan a un gran número de traballadores ao desemprego".

Para o dirixente do sindicato nacionalista, "atopámonos cun panorama onde moita xente está a consumir o seu desemprego sen visos de recuperalo".

Pola súa banda, a responsable de Emprego de Comisións Obreiras de Galicia, Maica Bouza, incide en que os datos do paro do mes de marzo "non reflicten a realidade" do mercado laboral, ao explicar que estes mostran só unha parte dos contratos temporais non renovados e dos despedimentos individuais, xa que non recollen as cifras da última quincena e a afectación dos ERTE.

Bouza destaca o "importante bajón" da actividade económica, coa consecuente contracción da contratación no último mes de marzo.

Desde USO-Galicia, o seu portavoz, Javier Souto, sostén que os efectos da crise actual, sanitaria e do emprego, "son alarmantes, polo que perdemos este mes, pero, sobre todo, polo que se continuará perdendo nos próximos meses".

Comentarios