Preto de 520.000 galegos viven no estranxeiro, segundo os datos publicados este xoves polo Instituto Nacional de Estadística (INE), que mostran un incremento desta cifra ao longo do último ano.
De acordo cos datos rexistrados no Padrón de Españois Residentes no Estranxeiro, son 519.646 as persoas galegas residentes no exterior, unha cifra que supera os 516.489 contabilizados o ano pasado.
Con todo, a Xunta apunta -a través dun comunicado remitido aos medios- que o número de emigrantes naturais, aqueles nados en Galicia e que abandonan este territorio, descendeu neste último exercicio e mantén a tendencia á baixa desta década.
Deste xeito, hai un total de 151.763 persoas nacidas en Galicia que viven no estranxeiro, 2.549 menos que o ano pasado.
O aumento de número de galegos no exterior débese, pois, ao aumento dos descendentes de galegos xa emigrados, que representan o 71 % do total da masa migratoria.
Desde o Goberno galego tamén sinalan que, de acordo cos datos de 2017, regresaron a Galicia 6.202 persoas, procedentes principalmente de países como Venezuela, Suíza, Reino Unido ou Estados Unidos.
