Se o 5 de outubro de 1993 pasará á historia da política galega por ser o día do primeiro gran debate televisado dunhas eleccións autonómicas, o 29 de xuño de 2020 farao por converterse no debate máis nutrido duns comicios na comunidade, con sete aspirantes. Desde que Manuel Fraga e Antolín Sánchez Presedo protagonizaron aquel primeiro cara a cara en Antena3 televisión houbo que esperar a 2012 para ver de novo un debate de primeiro nivel nunha carreira cara á Xunta; e tamén foi nese formato cara a cara. Así que ata 2016 os galegos non gozaron do actual formato multicandidato, aínda que nesa ocasión con cinco candidatos en liza.
Este luns sentarán sete no estudio da TVG para contrapor as súas ideas, receitas e programas para os próximos catro anos en Galicia. Aínda que de arranque todos eles parten dun punto común: a importancia que pode ter o que será o único gran debate electoral desta campaña. E proba diso é que a maioría despexaron as súas axendas para preparar a fondo unha cita decisiva.
O presidente da Xunta e candidato á reelección polo PP, Alberto Núñez Feijóo, aproveitou a tarde deste domingo e practicamente fará o mesmo hoxe para deseñar un debate que ve como "un seis contra un". Prepárao en Monte Pío e, segundo fontes do PPdeG, considérao unha cita "moi importante". O obxectivo é convencer aos votantes de que o seu proxecto é a mellor fronte ao dos seis partidos da oposición, polo que quere ir "preparado e concentrado".
O modelo do candidato socialista, Gonzalo Caballero, é totalmente diferente, xa que mantivo toda a súa axenda de fin de semana sen reservar tempo para preparar o debate, algo que fará este luns. Segundo explican desde o partido, Caballero é máis partidario de improvisar e non se sente cómodo cando ten que seguir un guión preestablecido, polo que recorrerá á experiencia que ten como tertuliano en televisión para afrontar este debate.
A candidata do BNG, Ana Pontón, sitúase no outro extremo, e reservou a súa axenda de toda a fin de semana para descansar e preparar o debate, do mesmo xeito que fixo nas eleccións de 2016, cun pequeno equipo de colaboradores que fan o labor previa de recompilación de datos.
Pola súa banda, o candidato de Galicia En Común-Anova Mareas, Antón Gómez-Reino, baleirou a súa axenda desde o domingo ao mediodía e tamén aproveitará a mañá deste luns xunto co seu equipo de campaña para ultimar o debate.
Tamén a cabeza de lista de Marea Galeguista, Pancho Casal, aproveitou a tarde do domingo e repetirá este luns para chegar ben a unha cita na que pretende gañar visibilidade. Igual que a candidata de Cidadáns, Beatriz Pino, que tamén preparou a fondo o que será o seu debut electoral, pero non televisivo xa que se dedicou profesionalmente a ese medio.
A cabeza de lista de Vox pola Coruña, Ricardo Morado, será finalmente o elixido polo partido verde para a cita. Este luns tómase o día libre para "repasar temas locais e rexionais", afirma.
Quen participa? Alberto Núñez Feijóo (PP), Pancho Casal (Marea Galeguista), Gonzalo Caballero (PSdeG), Ana Pontón (BNG), Antón Gómez Reino (Galicia en Común), Beatriz Pino (Cs) e Ricardo Morado (Vox).
Onde se pode ver? Desde as 19.30 horas haberá un especial informativo na TVG conducido por Ana Celia Vázquez. Poderase seguir en Televisión de Galicia, Radio Galega, G2 e os medios dixitais da corporación pública.
Que bloques hai?
Serán catro bloque temáticos: coronavirus, economía, política social e modelo institucional. Haberá unha rolda de presentación inicial e outra de despedida que abrirá e pechará Alberto Núñez Feijóo.
