Axentes da Policía Local de Vigo denunciaron nunha noite tres usuarios de patinetes eléctricos por circular pola beirarrúa e cometer outras infraccións. Un deles é reincidente, xa que fora denunciado hai un mes polos mesmos feitos.
Este mozo, de 25 anos, intentou esquivar os axentes na Travesía de Vigo na madrugada do luns ao martes ao detectar a súa presenza, polo que tratou de dar un rodeo á mazá. Finalmente foi interceptado pola Policía, que o denunciou.
Apenas media hora antes, pasada a medianoite, rexistrouse a denuncia a outro condutor de patinete eléctrico, un mozo de 17 anos que circulaba pola beirarrúa na rúa Urzáiz. Os axentes solicitaron a presenza da súa nai para tramitar a denuncia, ao ser o mozo menor de idade .
A Policía Local realizou unha terceira intervención esa madrugada, na zona de Praza de América. Alí foi interceptado un usuario dun patinete eléctrico de 46 anos e nacionalidade portuguesa, que, ademais de circular pola beirarrúa, non vestía pezas reflectoras, non levaba iluminación e deu positivo en cannabis. Dado o seu estado, e ao non designar ningunha persoa que se fixese cargo, os axentes inmobilizaron o patinete.
