A empresa galega Micaton Ergonomics sacará en breve ao mercado o que cualifica como o ximnasio máis pequeno do mundo, un enxeño de apenas 800 gramos e uns 15 centímetros que, baseado na tecnoloxía inercial, é capaz de multiplicar por 165 o peso de pequenos discos que substitúen ás pesas. O director de Micaton, Manuel Montes, presentou en rolda de prensa este pequeno ximnasio, chamado Traktus, que nunha primeira fase sairá á venda na plataforma de financiamento de proxectos creativos Kickstar, co obxectivo de recadar entre 600.000 e un millón de dólares en 30 días.
Montes, acompañado pola presidenta do Círculo de Empresarios de Galicia, Patricia García, e pola concelleira e expedicionaria Chus Lago, detallou que no desenvolvemento de Traktus participaron enxeñeiros da Universidade de Vigo, que investiron máis de 3.000 horas de traballo. Os aparellos construiranse en serie en empresas da automoción da provincia de Ourense e, segundo as previsións que manexa Micaton Ergonomics, o obxectivo é chegar aos 2 millóns de euros en vendas en 2019.
O prezo de mercado de Traktus oscilará entre os 150 e os 300 euros
As súas canles de distribución serán os grandes centros deportivos, cadeas comerciais e a teletienda. A idea orixinal era un aparello que axudase a mellorar a mobilidade dos enfermos de Parkinson, pero os diferentes prototipos foron evolucionando ata dar co que será o ximnasio máis pequeno do mundo.
Manuel Montes avanzou que o prezo de mercado de Traktus oscilará entre os 150 e os 300 euros, en función dos complementos que se adquiran, xa que ao aparello pódenselle engadir diversos elementos para cada tipo de exercicio e músculo que se queira traballar, ademais de fijadores a paredes, árbores ou portas.
Micaton Ergonomics creou tamén unha aplicación con máis de 200 exercicios que se poden facer con este aparello.
