Investigadores do Instituto de Investigación de Santiago (IDIS) participan no proxecto internacional Diamonds -acrónimo da iniciativa en inglés- que busca crear unha proba rápida, dunhas dúas horas, para diagnosticar enfermidades graves como a sepsis ou a meninxite mediante a utilización de firmas "xenéticas personalizadas". A iniciativa está integrada por un consorcio internacional que conseguiu un financiamento de 22,5 millóns de euros da Unión Europea para o seu desenvolvemento.
O grupo do IDIS está liderado por Federico Martinón Torres, xefe do servizo de Pediatría da área sanitaria de Santiago e Barbanza, e Antonio Salas Ellacuriaga, xenetista e catedrático da Universidade de Santiago de Compostela. O obxectivo deste proxecto é axilizar os diagnósticos que a día de hoxe poden tardar días ou semanas antes dunha resolución precisa o que atrasa "o tratamento eficaz", indica o centro investigador nun comunicado.
O estudo pretende que se poida obter un diagnóstico preciso e rápido "coa primeira mostra de sangue tomado cando un paciente acode a un hospital ou centro de saúde, ao identificar o patrón de xenes activados no sangue de cada paciente".
O estudo coloca a Galicia e ao Sergas na primeira liña de investigación internacional en enfermidades infecciosas
O grupo de investigación do IDIS encabeza o grupo de traballo relativo co recrutamento clínico de miles de pacientes en toda Europa con afeccións causadas por infeccións e inflamación, e o relacionado co almacenamento e tratamento dos datos xenómicos a gran escala que vai xerar o proxecto de investigación.
Nun comunicado remitido á prensa, Martinón sinala que "esta proba podería cambiar por completo a forma en que se diagnostica e manexa aos pacientes", porque podería acelerar os tempos de diagnóstico para moitas afeccións graves e enfermidades inflamatorias e inmunitarias, en menos de dúas horas.
O especialista considera que coa participación neste proxecto, o IDIS alcanza "un fito sen precedentes no campo da investigación pediátrica", e coloca a Galicia e ao Sergas na primeira liña de investigación internacional en enfermidades infecciosas.
