Axentes da Policía Local de Vigo detiveron a unha veciña da cidade, E.P.C., de 61 anos, como presunta autora dun delito de atentado contra axentes da autoridade, ao atacar aos policías que a ían multar por estar mal estacionada. Os feitos tiveron lugar na tarde do luns, cando varias dotacións do 092 acudiron á zona de Churruca tras recibir o aviso de que había varios coches mal aparcados, obstaculizando a circulación.
Unha vez no lugar, na rúa Uruguai, os axentes comprobaron que había varios vehículos incorrectamente estacionados, polo que procederon a tramitar as correspondentes denuncias. Entre a liña de coches mal aparcados, saíu un turismo que se dispuña a marchar, e os axentes déronlle o alto para informar á súa condutora de que sería sancionada.
Nese momento, a muller apagou o motor e deixou o coche no medio da calzada, comezando a gritar e a insultar os axentes, e facendo caso omiso das súas indicacións de que sacase o turismo de alí porque estaba a obstaculizar a vía. Non só non se moveu, senón que seguiu increpando aos policías e incluso chegou a propinar varios lapotes a algún deles, cando intentaban facela entrar en razón. Por estes feitos, a señora foi detida.