A Policía Autonómica informou este venres da detención de tres persoas na localidade coruñesa de Porto do Son por un presunto delito de furtivismo.
Segundo relata a unidade policial nun comunicado, os tres individuos colleitaban polas noites e de modo habitual percebe nesta zona sen a habilitación precisa para realizar esta actividade, polo que causaban, afirman, "grave dano tanto á flora como á fauna".
A operación levouse a cabo en colaboración cos axentes do servizo de Gardacostas da Xunta, que o pasado mes de xullo detectaron a membros deste grupo portando no seu vehículo marisco furtivo, dando inicio así a unha investigación que concluíu esta semana.
No seu día, incautáronse ata 36 quilos de percebe obtidos de forma ilegal. As dilixencias sobre este caso foron agora trasladadas ao xulgado de Noia (A Coruña).
