Un home foi detido a primeira hora da mañá do domingo por un delito de violencia de xénero como presunto autor dunha agresión á súa parella nun establecemento hostaleiro en Santiago de Compostela.
Segundo informou a Policía Local, foi sobre as 6.50 horas do domingo nun establecemento hostaleiro situado na rúa Alfredo Brañas. Os axentes acudiron ao lugar tras ser requiridos pola muller, que foi atendida polo 061 e trasladada ao Complexo Hospitalario Universitario de Santiago (CHUS).
A muller presentou unha denuncia en comisaría e os axentes procederon á detención do suposto autor da agresión e a tramitar as dilixencias oportunas.
