A Policía Nacional detivo o propietario dun local de ocio da Ronda da Muralla de Lugo como suposto responsable dun delito de lesións graves. Os feitos ocorreron a fin de semana pasada no exterior do establecemento, segundo a denuncia que presentou o agredido, cuxo relato foi ratificado por varios testemuños. O agresor foi localizado o xoves, detido e posto a disposición xudicial.
Eran as cinco da madrugada do pasado domingo, cando, segundo relata a Policía Nacional, uns clientes do pub, ao terminar as súas consumicións, abandonaron o local para dirixirse ao vehículo dun deles, que estaba cerca. Nese momento, o dono do local sairía detrás deles recriminándolles que non abonaran as consumicións.
Así, dirixiuse a unha das mulleres do grupo, que manifestou que a pesar de estar "bastante ebrios", si pagaran. O propietario, "non conforme", entraría no local e collería dúas botellas de cristal, coas que se dirixiu aos denunciantes. Segundo informa a Policía, rompeu unha delas na cabeza do home, un veciño da cidade de "mediana idade", que caeu ao chan e tivo que ser atendido no lugar por servizos médicos. Foi trasladado ao Hula e posteriormente derivado ao hospital da Coruña.
Debido ao golpe, o home tivo que ser intervido dun ollo e está á espera de realizar novas probas médicas, para determinar o alcance final das lesións.
Segundo a Policía, unha vez no chan, o agresor "continuaba coa acción, de non ser a intervención dos transeúntes e a inmediata chegada das dotacións policiais". Destaca tamén que o agora detido continuou cunha "actitude despectiva cara aos presentes".
Atendendo á información policial, o local foi inspeccionado en varias ocasións por diferentes tipos de infraccións administrativas.
