A Policía Nacional detivo un home de 53 anos de idade como responsable dun delito de roubo de vehículo, outro delito contra a seguridade viaria, e un terceiro de atentado contra axente da autoridade, tras unha longa persecución policial que percorreu os termos municipais de Vigo, O Porriño e Mos.
Tal suceso desencadeouse á primeira hora da mañá cando unha dotación policial virou na rotonda de Isaac Peral e observou a un vehículo subido encima da beirarrúa coa porta do condutor aberta.
Un dos axentes saíu do vehículo policial para dirixirse ao condutor do vehículo e, tras ordenarlle que apagase o motor, este acelerou e saíu a toda velocidade cara a un dos axentes que tivo que saltar fóra da vía para evitar ser arroiado.
Nese momento iniciouse unha persecución pola autoestrada AP-9, en dirección Baiona, por onde circulou varios quilómetros ata o desvío para a autovía A-55, dirección O Porriño. Varios quilómetros despois desviouse por unha vía de servizo, na zona de Petelos (Mos).
O fuxido ía dando volantazos que provocaban que o resto de condutores tivesen que botarse fóra da vía para evitar unha colisión.
Os axentes, consta na nota remitida á prensa, afastáronse do vehículo para evitar riscos co resto de condutores á vez que deron aviso da súa localización aos demais indicativos.
O vehículo fora roubado, e o propietario xa estaba na comandancia realizando a correspondente denuncia.
A través doutra investigación paralela, os policías lograron identificar ao presunto autor do roubo, polo que se dirixiron ao domicilio deste, situado nun barrio próximo.
Ao chegar á casa viron no interior dun alpendre o vehículo fuxido, así como ao condutor, o cal ao decatarse da presenza policial saíu correndo cara á vivenda, sendo interceptado polos axentes a escasos metros.
Tras inmobilizalo, procederon á súa detención e traslado a dependencias policiais do Corpo Nacional de Policía en Vigo, á vez que se trasladaba o vehículo ao cuartel de Porriño.
A detido conta con 39 antecedentes policiais, ademais dunha orde de procura, detención e ingreso en prisión.
