A Policía Local de Pontevedra detivo un home de 32 anos como suposto autor dun delito de violencia de xénero. Foi arrestado sobre as 15.45 horas do venres, despois de que un veciño alertarse telefonicamente de que nunha vivenda próxima se escoitaban ameazas e fortes golpes, e de que unha muller gritaba 'non me pegues'.
A Policía Local enviou ao lugar varias patrullas. Unha vez na vivenda, unha muller abriulles a porta, en presenza de dúas fillas da parella menores de idade. Explicou que o seu compañeiro se puxo moi agresivo e tirara obxectos ao chan, ademais de romper unha televisión dunha patada e o cristal dunha porta.
Os axentes detiveron entón ao home como suposto autor dun delito de violencia de xénero.
A partir deste caso, a Policía destaca a importancia da "implicación" da sociedade na erradicación dos delitos de violencia de xénero. "Tanto na violencia doméstica como na de parella danse unhas circunstancias tales (relacións afectivas, ambiente de medo, convivencia nun mesmo domicilio...) que moitas veces deixan as vítimas a mercé do delincuente de tal forma que a axuda externa e a solidariedade cidadá é, en ocasións, a única forma de que a súa situación acabe por saír á luz e sexa detectada polas forzas de seguridade", destaca.
