Detido por portar máis de 50 doses de drogas no seu coche e conducir baixo os seus efectos

A Garda Civil interceptouno nun control no Porriño
Diñeiro e drogas incautadas ao detido no Porriño. GARDA CIVIL
photo_camera Diñeiro e drogas incautadas ao detido no Porriño. GARDA CIVIL

Un home de 47 anos foi detido no Porriño por portar máis de 50 doses de cocaína e outras sustancias psicoactivas no seu coche, que evidenciaban a súa relación co tráfico de drogas, e conducir baixo os seus efectos. 

Segundo trasladou a Garda Civil, os feitos tiveron lugar esta fin de semana de madrugada no marco dun control realizado na N-550, onde se interceptou a este home ao comprobar que circulaba sen activar a iluminación regulamentaria. 

Tras identificar a este home, que, nun principio, achegou unha identidade falsa; os axentes comprobaron que se lle retirara o permiso de condución ao perder a totalidade dos puntos e que lle constaba unha orde xudicial de procura, detención e personación dun xulgado de Tui. 

Por estes motivos, realizáronselle cinco probas de consumo de distintas drogas cuxos resultados foron positivos. Ademais, tras rexistrar o seu vehículo, os garda civís interceptaron máis de 50 doses de cocaína, 70 gramos de haxix e máis de 22 pastillas de metadona, así como 350 euros en efectivo e obxectos relacionados con delitos contra o patrimonio. 

Posteriormente, este home foi detido como presunto autor de delitos contra a saúde pública, tráfico de drogas, e contra a seguridade viaria. Así, trasladáronse as dilixencias e os efectos intervidos ao Xulgado de Instrución de garda do Porriño, que decretou a súa posta en liberdade. 

Comentarios