Axentes da Policía Local de Vigo localizaron e detiveron un home de 55 anos que presuntamente tratou de secuestrar un neno de 9 que estaba a xogar nun parque infantil do barrio do Calvario.
Segundo informou este xoves o corpo nun comunicado, os feitos sucederon a media tarde do martes, cando a Policía soubo polos pais do neno que un individuo se achegou a el mentres xogaba cuns amigos e, agarrándoo dun brazo, díxolle que o acompañase a un lugar onde tiña un camión de xoguete.
Foi un veciño quen alertou aos pais do que estaba a suceder, xa que o neno adoita xogar a diario nese parque infantil. O pai do neno saíu á carreira tras o presunto secuestrador, que levaba ao seu fillo do brazo e ao que só soltou, antes de abandonar apresuradamente o lugar, cando escoitou os berros do proxenitor.
O pai contou aos axentes que o home frecuentaba desde había días o parque e que sentaba a observar os raparigos mentres manipulaba un computador.
Os axentes peitearon a zona e localizaron nunha rúa próxima o presunto secuestrador, que foi recoñecido polo pai do neno. O home, que na mochila levaba un coitelo de 22 centímetros de folla ademais do portátil, foi detido por un delito de detención ilegal en grao de tentativa. De iniciais E.F.A., o home é veciño de Vigo.
