Axentes da Policía Local de Vigo detiveron a un veciño da cidade, R.Y.D., natural de Colombia e de 23 anos de idade, como presunto autor do intento de apuñalamento a dous porteiros de locais de copas.
Segundo informaron fontes policiais, os feitos tiveron lugar na madrugada do pasado sábado, cando o 092 recibiu un aviso urxente sobre a presenza dun mozo que ameazaba con agredir aos porteiros dunha discoteca na zona do Areal. Cando os axentes chegaron, comprobaron que un grupo de mozos fuxía do lugar á carreira, e viron na porta de acceso do local a un mozo cun puñal na man, lanzándoo cara a adiante, e gritando ameazas de morte.
Segundo as testemuñas aos que interrogaron, o mozo pretendía entrar nun local pero o porteiro impediullo, debido ao estado no que se atopaba. Nese momento, o mozo sacou o coitelo dunha bandoleira que levaba e intentou apuñalar ao traballador do local, que puido esquivar o ataque e refuxiarse no interior da discoteca.
O porteiro do local de ao lado, ao ver que a xente fuxía gritando de alí, achegouse. Cando comprobou o que pasaba, intentou tranquilizar ao mozo pero este abalanzouse cara a el e tamén intentou apuñalalo. Mentres este segundo porteiro logrou porse a salvo, o sospeitoso arremeteu contra a porta do local co coitelo, causando danos na mesma, ata que chegaron os axentes policiais e o detiveron.