jueves. 28.05.2020 |
El tiempo
jueves. 28.05.2020
El tiempo

Cinco detidos por 35 asaltos a xeriátricos en Galicia, Asturias e León

Diñeiro e xoias roubadas nos xeriátricos. GARDA CIVIL
Diñeiro e xoias roubadas nos xeriátricos. GARDA CIVIL

O grupo desarticulado trasladaba a Romanía o subtraído. Vincúlaselles con roubos de diñeiro e xoias 

A operación Gerpo-Avós, desenvolvida pola Garda Civil, conseguiu desmantelar un grupo criminal composto por cinco persoas ás cales se lles vincula con máis de 35 asaltados a unha trintena de residencias da terceira idade en municipios de Galicia, Castela e León e Asturias. 

Por provincias, esclarecéronse un total de nove asaltos en Pontevedra, cinco en Ourense, tres en Lugo, 14 na Coruña, un en Asturias, e tres en León. 

Os supostos responsables, de nacionalidade romanesa e con residencia na cidade da Coruña, foron detidos nunha operación tutelada polo Xulgado de Primeira Instancia e Instrución Número 2 de Lalín e a Fiscalía de Pontevedra e desenvolvida polas Unidades Orgánicas de Policía Xudicial das Comandancias da Garda Civil de Pontevedra e A Coruña. 

A investigación destaca o perigo desta banda, que actuaba de noite, mentres os usuarios e facultativos dos xeriátricos durmían. O grupo chegaba a percorrer ata 425 quilómetros nun só día para cada asalto. 

Os membros da banda definían con antelación suficiente cada golpe para evitar ser detidos. Por iso buscaban residencias que estivesen suficientemente afastadas do seu centro de operacións e, preferiblemente, as que tamén estivesen apartadas de núcleos de poboación importantes, asegurándose así unha maior privacidade para poder actuar e escapar do escenario. 

O grupo chegaba a percorrer ata 425 quilómetros nun só día para cada asalto

Empregaban tamén distintas identidades para dificultar a súa identificación. Os investigadores estableceron primeiro un perfil dos asaltantes para conseguir definir o modus operandi que permitise volver sobre os seus pasos, estudando os seus movementos. 

O grupo accedía en coche ata a contorna do seu obxectivo e estacionaba a unha distancia suficiente como para non levantar sospeitas, chegando a deixar o vehículo ata a catro quilómetros de distancia para non ser vistos. Chegaban a pé ata as residencias e forzaban as portas ou fiestras con pancas ou rompendo o bombín. 

A súa prioridade eran as oficinas das residencias, onde normalmente están as caixas fortes, e delas levaban o ouro e o diñeiro en metálico dos residentes. Ademais, subtraían os dispositivos electrónicos, como ordenadores, teléfonos móbiles ou ordenadores e fuxían por zonas boscosas e frondosas conseguindo eludir as medidas de seguridade. 

A súa prioridade eran as oficinas das residencias, onde normalmente están as caixas fortes, e delas levaban o ouro e o diñeiro en metálico dos residentes

A Garda Civil detectou un incremento da actividade do grupo, que chegou a cometer cinco asaltos nunha mesma semana en puntos tan distantes como Ponferrada, O Barco de Valdeorras ou Lalín.

IMPROVISABAN. Nalgún caso, cando non conseguiran perpetrar o asalto planificado, improvisaban outro a calquera establecemento de hostalería da mesma localidade, levando o diñeiro da máquina comecartos, o da caixa rexistradora e o tabaco. 

Esta banda criminal contaba con intermediarios no seu país de orixe, onde enviaban o diñeiro en metálico que subtraían nas residencias da terceira idade valéndose de distintas compañías. 

As xoias e todos os efectos de ouro chegaban a Romanía, ben a través de empresas de paquetería asentadas nese país ou na equipaxe de man dalgún dos membros deste grupo. Terceiras persoas encargábanse de vendelos e reingresar o importe nas contas dos asaltantes ou dalgún familiar. 

A operación Gerpo-Avós culminou o pasado sábado na Coruña coa detención de cinco cidadáns de países do Leste e a incautación de tres vehículos. Nos rexistros recuperáronse 5.200 euros en metálico, equipos electrónicos, xoias e ferramentas de ferraxería vinculadas aos asaltos. 

Tres dos arrestados, con múltiples antecedentes policiais e varias requisitorias en vigor, están xa en prisión por orde xudicial. A investigación considéraos autores materiais dos feitos. Os outros dous quedaron en liberdade con cargos. 

Cinco detidos por 35 asaltos a xeriátricos en Galicia, Asturias e León
comentarios