A Garda Civil detivo a tres lucenses, con idades comprendidas entre os 28 e 46 anos de idade, no marco de Operación Cotoroso, como supostos autores de 110 roubos perpetrados no interior de vehículos estacionados nas inmediacións de hospitais como o Hula e o Polusa, en Lugo, o CHUS, en Santiago de Compostela e o Chuac, na Coruña
Segundo informou o instituto armado, os dous xefes do grupo, con iniciais A.C.M e S.C.M, son investigados por eses cento dez roubos, mentres que os investigadores do caso puideron acreditar tamén a participación de J.M.M, fillo do primeiro, nalgún deses delitos contra o patrimonio.
Os feitos polos que foron detidos sucederon entre novembro de 2016 e outubro de 2017, meses nos que a Garda Civil detectou un incremento de roubos no interior de vehículos que estaban estacionados nas inmediacións de centros hospitalarios e instalacións deportivas.
A colaboración cidadá puxo aos investigadores sobre a pista dos posibles autores dos roubos, dado que un dos vehículos nos que se desprazaban para perpetrar os roubos foi visto por varias testemuñas.
O traballo policial permitiu comprobar aos investigadores como os detidos, que "non exercían traballo nin actividade económica algunha", dedicábanse "día tras días a deambular polos aparcadoiros de centros hospitalarios, campos de fútbol, centros deportivos e restaurantes da provincia de Lugo".
A pesar das medidas de precaución que adoptaban, nalgunha ocasión foron sorprendidos por testemuñas, polo que nos días posteriores desprazábanse a outros lugares, normalmente ás inmediacións dos hospitais de Santiago e A Coruña.
En varias ocasións, chegaron a violentar "taxis e autobuses para roubar a súa recadación".
Nos rexistros realizados e nas inspeccións realizadas en tendas de compravenda de obxectos foron recuperados parte dos obxectos roubados, que xa foron devoltos aos seus donos. Entre os obxectos recuperados figuran sete teléfonos móbiles, varias cadeas de ouro, carteiras e bolsos.
Ademais dos tres detidos investígase por delitos de receptación a outras cinco persoas.
A investigación foi desenvolvida pola Policía Xudicial de Lugo e foi coordinada polo Xulgado de Instrución de Arzúa, que decretou o ingreso en prisión dun dos detidos.
