Unha nova de 25 anos e un menor de 17 foron detidos durante a madrugada do pasado domingo por traficar con diversas drogas durante a celebración do Festival Armadiña Rock 2019.
A identificación da parella produciuse por mor de que, no marco do plan de seguridade desenvolvido para o festival, a Policía Local de Poio descubriu varios envoltorios de fungos alucinógenos e marihuana en posesión de dúas mulleres. Tras as pertinentes pescudas, os axentes descubriron que a droga procedía dunha parella que se atopaba na Chaira da Chousa, lugar de celebración dos concertos.
Así, ao redor das 02:20 da madrugada do domingo, a Policía procedeu á identificación destas dúas persoas. Ao menor incautáronselle 22 gramos de cogomelos alucinógenas e 26 gramos de marihuana, ademais dun total de 294,48 euros –presuntamente procedentes da venda de droga–.
Á muller, pola súa banda, fóronlle intervidos 51 gramos de cogomelos alucinógenas, 40 gramos de marihuana, 0.5 gramos de speed, 4,6 gramos de haxix, 10 gramos de planta ruda, varias pastillas de MDMA, así como 207,91 euros.
Ante isto, os axentes detiveron a ambos, veciños de Betanzos, por un presunto delito contra a saúde pública e instruíron as correspondentes dilixencias.
