A nova dirección de Podemos Galicia tratará de consolidar e facer valer a súa posición en todas as cidades da comunidade apoiando a un candidato «oficialista» nos distintos procesos de primarias abertos para elixir secretario xeral municipal, coa vista posta nos comicios locais do próximo maio. De feito, moitos destes nomes, como o de José Manuel Pérez Alfonso, ‘Josito', en Lugo, proceden da lista coa que Antón Gómez Reino venceu nos comicios internos para liderar a formación morada en Galicia a finais de outubro.
En concreto, concorrerán ás primarias co aval da dirección o exsenador José Manuel García Buitrón na Coruña e Borja San Ramón en Ferrol. En Santiago, as opcións que se manexan son a parlamentaria autonómica lucense Luca Chao, o exportavoz de Compostela Aberta Álex Botello ou David Domenech. á parte desta proximidade a Gómez Reino, trátase de aspirantes que responden a perfís próximos aos procesos de unidade popular. A razón é que se trata de tres cidades gobernadas polas mareas —Marea Atlántica, Compostela Aberta e Ferrol en Común—, é dicir, as consideradas como «marcas consolidadas» que non incluirán as siglas de Podemos na papeleta para as eleccións municipais do maio que vén. Todo iso fará que as negociacións entre a formación morada e as confluencias de Santiago, A Coruña e Ferrol, teñan particularidades.
Doutra banda, en Vigo o candidato oficial será Xaquín Pastoriza, en Pontevedra José Ramón Otero e en Ourense Víctor Ferreiro.
ATA O 27. As listas definitivas coñeceranse o venres. As votacións telemáticas terán lugar entre os días 20 e 25 deste mes e a publicación dos resultados o 27.
