A Sección Segunda da Audiencia de Pontevedra condenou a dous anos de cárcere a J.M.P.O., un veciño de Meis que foi interceptado con case 23 gramos de heroína durante un control da Garda Civil á saída da autovía do Salnés.
A Fiscalía solicitaba inicialmente tres anos de prisión, pero rebaixou a pena tras chegar a un acordo de conformidade co procesado, que se recoñeceu como autor dun delito contra a saúde pública.
Na sentenza considéranse feitos probados que este home levaba a droga oculta no interior do calcetín dereito, gardada nunha bolsa de plástico con forma de bóla.
O procesado atópase en prisión preventiva desde o pasado 28 de abril cando foi interceptado na estrada en posesión de 22,862 gramos de heroína, cunha pureza do 16,09%, "destinados á súa distribución entre terceiras persoas".
O valor da droga incautada a J.M.P.O., no caso da súa venda por gramos, pode superar os 670 euros. Ademais da pena de prisión, ao home impúxoselle unha multa de 1.360 euros.
Dous anos de cárcere para o home interceptado con heroína na autovía do Salnés
O procesado está en prisión preventiva desde o pasado 28 de abril