O grupo parlamentario confederal de Unidos Podemos-EnComú Podem-En Marea instou ao Goberno central a retirar os nomes de "connotados golpistas e ministros da ditadura franquista" do rueiro do arsenal de Ferrol en cumprimento da Lei 52/2007.
Fíxoo a través dunha proposición non de lei para o seu debate en Pleno e como consecuencia dunha iniciativa dos deputados de En Marea Yolanda Díaz e Miguel Anxo Fernán Vello, e a través do seu portavoz, Alexandra Fernández.
E é que o obxectivo da Lei 52/2007 é, en palabras dos parlamentarios, "devolver" á sociedade española "a dignidade que preservaron todas aquelas persoas que loitaron en defensa das liberdades republicanas". No entanto, entenden que esta norma é "tan tardía como insuficiente", pois, subliñaron, "renunciou a consignar a declaración de nulidade das sentenzas condenatorias do franquismo".
A continuación, lamentaron que o Goberno do PP, actualmente en funcións, "permaneza enfeudado na práctica a lealdades con aquela parte dos poderes fácticos que promoveron un golpe de estado contra a II República".
"O ininteligible para calquera razoamento democrático é que cando transcorreron máis de 37 anos da aprobación dunha Constitución que superaba o marco legal da ditadura, siga habendo espazos públicos que honren a memoria de personaxes da ditadura", recolle dito escrito á Mesa do Congreso.
Por iso, consideran estes deputados que o cualificativo que se pode aplicar a un Goberno que "incumpre" esta lei "seguro que desborda os estreitos límites da denominada cortesía parlamentaria".
Sobre o caso concreto do rueiro do arsenal de Ferrol, lamentaron que na cidade natal de Franco permaneza un espazo "alleo ao carácter democrático e social" do actual Estado español. "O rueiro do arsenal militar de Ferrol está dedicado a persoas que teñen as mans manchadas de sangue de demócratas e que participaron no golpe de estado e ocuparon significativas responsabilidades na ditadura franquista: Salvador Moreno Fernández, Manuel de Vierna e Belando, José María González-Chairos e Caruncho ou o marqués de Alborán, Francisco Moreno e Fernández", recolle o escrito.
En Marea insta o Goberno a retirar os nomes de franquistas do rueiro do arsenal de Ferrol
A través dunha proposición non de lei, os deputados Yolanda Díaz e Miguel Anxo Fernán Vello piden "delvolver" á sociedade "a dignidade que preservaron todos os que loitaron en defensa das liberdades republicanas"
