O dispositivo de procura formado por Protección Civil, Bombeiros, GES, Policía Local e Policía Nacional localizou en torno ao mediodía deste xoves o corpo do novo, duns 20 anos de idade, que fora arrastrado pola corrente no río Miño ao seu paso por Ourense.
Segundo confirmou a Policía Nacional, o corpo do mozo foi recuperado próximo á zona na que fora arrastrado pola corrente.
O mozo, veciño de Portugal e de orixe angolana, introduciuse na auga para bañarse ao redor das 17.30 horas do mércores, nas proximidades da Ponte Romana, e foi arrastrado polo río. Estaba a realizar o Camiño de Santiago en compañía duns amigos, segundo precisaron fontes de Protección Civil.
O dispositivo de rastrexo prolongouse durante a tarde do mércores ata a noite e retomouse ao oito da mañá, coa participación de efectivos de Protección Civil de Ourense e de Barbadás, do GES de Pereiro de Aguiar, os Bombeiros da cidade, e axentes da Policía Nacional e Local.
Durante toda a noite procedeuse a reducir o caudal da auga do río na zona na que desapareceu o mozo, ata limitalo a un nivel ecolóxico que, aínda que era apto para o tránsito de embarcacións, puidese permitir un mellor rastrexo do fondo do río.
