Os preto de 8,2 quilómetros que comprenden a N-642 –entre o cruzamento coa N-640 e o cruzamento coa N-634–, ao seu paso polo municipio lucense de Ribadeo, foron catalogados como os máis perigosos de toda a rede viaria nacional.
É a conclusión á que chega o estudo EuroRAP 2018 que cada ano analiza a accidentalidade viaria e que presentou en rolda de prensa polo director da Fundación do Real Automóbil Club de Cataluña (RACC).
En declaracións a EFE, o alcalde de Ribadeo, Fernando Suárez tirou de ironía e dixo sentirse "sorprendido por tan distinguido" recoñecemento, pero espera que polo menos sirva para que "Fomento se poña as pilas e os responsables que ten agora fagan algo máis, porque os que estiveron á fronte do Ministerio pouco fixeron" para mellorar a situación desa estrada "nos últimos anos".
De feito, o rexedor local precisou á prensa que o trazado non se tocou desde "tempos inmemoriais", de modo que Fomento non actuou para mellorar "o ángulo dalgunha curva" ou o "peralte" dalgunha outra.
"É un trazado moi bonito, que discorre paralelo á ría de Ribadeo, pero tamén moi sinuoso", dixo Fernando Suárez, quen recordou que a única intervención que recorda nos últimos anos foi unha actuación para reparar "parcialmente o aglomerado" dese tramo.
"Séguese mantendo o perigo", recoñeceu, e de forma especial para os usuarios que utilizan vehículos de dúas rodas.
É especialmente perigosa, recordou, para os ciclistas, porque nas marxes acumúlase moita grava e sucidade e non teñen máis remedio que irse "cara ao centro da calzada", co perigo que iso supón.
3.000 KILÓMETROS DE RISCO. Segundo o informe, algo máis de 3.000 quilómetros de estradas teñen un risco elevado ou moi elevado de que nelas se rexistre un accidente grave ou mortal, o que representa o 12,2% da rede viaria estatal, aínda que este índice mellorou en dous puntos respecto ao ano anterior.
Por provincias, Huesca, co 52%, é a que conta con maior proporción de quilómetros con elevado ou moi elevado risco de accidente, seguida de Teruel (43%), León (32%) e Lleida (31%), mentres que por comunidades autónomas encabeza a lista Aragón, co 35 por cento, seguida moi de lonxe por Cataluña e Asturias (ambas co 16 por cento) e Galicia (15%).
