Unha veciña da Estrada aceptou unha condena de dous anos de prisión por cobrar durante 20 anos a pensión do seu avó falecido. O xuízo celebrouse este xoves na Sección segunda da Audiencia Provincial de Pontevedra.
A muller recoñeceu que estivera cobrando a pensión do seu avó -con quen compartía unha conta bancaria- a pesar de que este levaba 20 anos morto. O cobro indebido produciuse entre 1996 e 2016, cando o Banco Santander (pagador do subsidio) estrañouse da lonxevidade do beneficiario, que entón debería ter 105 anos.
A muller admitiu que durante dúas décadas percibiu un total de 132.000 euros que non lle correspondían, pero na súa defensa alegou que ninguén, nin o banco nin a Seguridade Social, lle reclamaron nunca ningún xustificante de que o seu avó falecese. Conformouse cunha condena de dous anos de prisión e á devolución ao INSS de 99.000 euros, tendo en conta que a entidade bancaria xa devolveu 33.000 euros, correspondentes ás pensións comprendidas entre 2012 e 2016.
Con todo, ao ser insolvente, a responsabilidade civil recae sobre a entidade, quen expuxo, na súa defensa, que este proceso se debe a unha "neglixencia" da Seguridade Social, por non habilitar os mecanismos para notificarlle a defunción do titular da conta. Unha argumentación que comparte a Fiscalía, aínda que a fai extensiva ao propio banco, pois existe unha norma que obriga a todas as entidades a certificar anualmente a supervivencia dos receptores de calquera tipo de prestación pública.
A avogada da muller, pola súa banda, considerou que o pago do diñeiro pendente debe dilucidarse entre o Santander e o INSS, "porque eran responsables de realizar as comprobacións que ninguén reclamou á miña clienta". E aínda que hoxe en día o proceso xa está informatizado e automatizado, naquel entón (ano 1996), "ambas as dúas entidades debían haberse encargado de reclamar a documentación á neta do falecido, pero non o fixeron".
