Docentes de Galicia convocados por CIG, CC.OO., STEG e CSIF protagonizan este xoves, día do arranque do curso escolar en varios cursos, unha xornada de folga e diversas concentracións. O seu obxectivo é reclamar á Xunta que realice o investimento necesario para contratar persoal, reducir alumnos por aula e compensar os gastos extraordinarios por mor da aplicación do protocolo de adaptación dos centros á situación provocada pola Covid-19.
Os sindicatos cualificaron de "aberrantes" os servizos mínimos establecidos pola Xunta, que, con todo, foron avalados polo Tribunal Superior de Xustiza de Galicia (TSXG). No fallo, incídese en que "poucas veces a Administración, á hora de fixar os servizos mínimos esenciais ante a convocatoria dunha folga, foron tan clara e precisa na xustificación das medidas adoptadas".
Tamén alude reiteradamente á "gravísima situación" sanitaria e traslada unha mensaxe aos sindicatos: "Non quere pensar este Tribunal que as centrais sindicais que se agrupan no comité de folga recorrente carecen da especial sensibilidade da que, con bo criterio e especialmente nestes últimos días, fai gala a inmensa maioría da sociedade española, excluída, obviamente, aquela escasa representación que nega a existencia da pandemia".
Os sindicatos, pola súa banda, insisten na "improvisación" da consellería, co seu novo titular á fronte, Román Rodríguez, e lamentaron de novo a falta de investimento para "desdobrar" as aulas e incrementar o persoal.
INCIDENCIAS EN MEIS E A CORUÑA. A CIG sinalou ao caso "paradigmático" de Meis, onde Educación quere transmitir unha "imaxe de normalidade" e por iso chamou a un profesional para que se fixese cargo do colexio xa que o equipo directivo estaba en corentena.
Ademais, nun colexio da Coruña, o CEIP San Pedro de Visma, un pai foi detido por negarse a portar máscara cando acompañou á súa filla a clase.
Cando chegaron os axentes ao lugar, o home intentou agredilos cunha muleta que lle colleu a unha alumna, polo que acabou arrestado.
INSTITUTOS QUE APRAZAN O REGRESO. Pola súa banda, o sindicato STEG informou de que o paro está a ser secundado por unha "porcentaxe moi alta" do profesorado neste primeiro día da volta ao colexio.
A través dunha nota de prensa, reprobou que a incorporación do novo conselleiro á fronte de Educación "non se está traducindo nun novo rumbo" e avisou de que en Santiago "varios equipos directivos de secundaria dirixíronse por escrito á consellería anunciando que aprazan o inicio do curso pois é materialmente imposible organizar" o arranque "nos termos actualmente vixentes".
