Os expertos presentes nunha xornada de prevención da melanoma no Parlamento de Galicia recomendaron este mércores utilizar o dobre da protección solar que se utiliza de forma habitual, ao citar estudos que falan do escaso uso das cremas en comparación á cantidade para as que están deseñadas.
O Parlamento galego acolle este mércores a Xornada de coñecemento e prevención da melanoma, na que expertos do hospital clínico de Santiago e do hospital de Pontevedra examinan a deputados e traballadores, aos que aconsellan sobre as prácticas para o verán.
Incidiron na importancia de utilizar protector solar, que debe ser empregado en máis cantidade que a actual, pois os estudos demostran que o habitual é aplicar menos da metade do necesario, polo que recomendan facer unha segunda pasada de protector.
Non deben esquecerse aquelas áreas de exposición como a parte posterior do pescozo, as orellas ou o dorso das mans e é necesario ter en conta que a pesar de que non se produzan queimaduras, pode existir sobreexposición da radiación solar.
O presidente da Xunta, Alberto Núñez Feijóo, recordou que o Servizo Galego de Saúde (Sergas) ten "vías rápidas" para examinar as zonas sospeitosas de padecer melanomas, en especial antes do período de máis exposición ao sol. "Son os momentos oportunos para facer unha revisión, sobre todo a xente que vai tomar con intensidade o sol nos próximos meses. Hai vías rápidas, vías con moi pouca demora nos hospitais, cando hai algunha zona da pel que poida espertar algunha sospeita", subliñou.
En declaracións aos xornalistas á saída da xornada, Núñez Fejóo recomendou realizar consultas ou unha revisión "antes de tomar de forma intensa o sol", que se debe evitar entre as 12.30 e as 17.30 horas. "Que nos dediquemos (nesas horas) a tomar, se é posible, algo sen alcol ou unha cervexa (...) e poder falar e poder compartir. Deixar esas horas cruciais para outras cousas que non sexan unha exposición prolongada ao sol", pediu.
Apelou "á promoción da saúde, que é o fundamental" dentro dunha campaña que fala de tomar "sol, si, pero con moderación, e nesas horas do día, se é posible, non".
O presidente do Parlamento de Galicia, Miguel Santalices, asegurou que "determinados comportamentos saudables que poden previr moitas patoloxías" e, como médico, incidiu en que os deputados deben "trasladar á sociedade mensaxes saudables".
