Os expresidentes Rajoy e González pechan filas en torno ao rei Felipe VI

Os expresidentes Mariano Rajoy e Felipe González mostraron o seu apoio ao rei Felipe durante a celebración do Foro La Toja-Vínculo Atlántico. Precisamente, O monarca elixiu este foro e Galicia para protagonizar a súa primeira aparición pública, o pasado xoves, tras a polémica suscitada con motivo da súa ausencia na entrega de despachos xudiciais en Cataluña.

"Vexo e escoito a moita xente e doume conta de que moitos españois teñen temor pola pandemia e outros teñen temor polo que está a pasar, aquí parece que se ten que pór en cuestión todo", manifestou Rajoy antes de finalizar a súa intervención sobre A resposta de Europa. O expresidente quixo facer unha "defensa pública" da Constitución, "que supón unha reconciliación de moitos españois que estiveron enfrontados", da Monarquía, "que foi fundamental para conseguir o maior progreso económico e social deste país", así como das "regras do xogo e as institucións".

Tamén o expresidente González quixo facer público o seu apoio ao xefe do Estado. En comparecencia pública, e de xeito taxativo subliñou que "se alguén actuou impecablemente, con completa neutralidade e cunha prudencia exquisita foi o meu homónimo, Felipe VI" . 

"Hai quen prometeron lealdade sen crerllo desde o minuto un", engadiu Felipe González. A preguntas dos medios sobre se o Goberno debería cesar ao ministro de Consumo polas súas referencias á Coroa, González ironizou sobre que o ministro "ten moito tempo libre para pensar noutras cousas". "Nunha situación tan complicada como esta cando un non ten capacidade para xestionar é unha boa solución buscar outro problema para distraer", concluíu.