O Ministerio de Facenda concedeu dez anos máis de prazo ao Concello de Miño para a amortización da débeda de 12 millóns de euros que contraeu polo pago aos expropiados de Fadesa, que nun primeiro momento íase a facer en sete anos e agora farase en 17.
Así o informaron este xoves o portavoz provincial do PSdeG-PSOE na Coruña, Bernardo Fernández, e o alcalde de Miño, Manuel Vázquez Faraldo, nunha comparecencia na Coruña, onde explicaron que desta forma o Consistorio "máis endebedado da provincia" terá dez anos máis para pagar os créditos co Ministerio.
O alcalde de Miño, @Mvfaraldo explicou hoxe as medidas aprobadas polo Goberno de @sanchezcastejon para que o Concello poda flexibilizar o pago da débeda derivada do caso Fadesa. Un balón de osíxeno para a economía local tras anos de xestión neglixente do PP. pic.twitter.com/b246ASGdck
— PSdeG Prov. A Coruña /❤️ (@psoeprovcoruna) November 7, 2019
O pasado mes de setembro o Concello de Miño e as duascentas familias expropiadas para executar a urbanización Costa Miño pola promotora inmobiliaria Fadesa alcanzaron un acordo polo que os afectados cobraron todo o adecuado polos seus terreos, excepto os intereses, quedando a administración local endebedada.
Na rolda de prensa, o rexedor detallou que deste xeito se minora "a carga que soportan os veciños por culpa da neglixente xestión dos Gobernos anteriores do PP municipal".
En 2018, recordou, pagaron 1,7 millóns da débeda e terían que abonar a mesma cantidade anualmente pero, grazas ao adiamento, non pagarán nada ata 2022 e, a partir de aí, abonarán 700.000 euros anualmente ata 2038.
Ademais, o Concello tamén solicitou ao Ministerio un crédito de sete millóns de euros, a cantidade de intereses que deben aos expropiados e, se conseguen abonalos antes do primeiro semestre do 2020, os afectados renuncian a cobrar 250.000 euros.
O rexedor agradeceu as xestións do Ministerio de Facenda, da Deputación da Coruña e tamén a boa disposición da Xunta de Galicia, pois están a intentar que esta permita "que a deputación poida pór o diñeiro das cotas de amortización dos sete millóns" que necesita a autorización do Goberno autonómico.
Bernardo Fernández recordou que o Plan Único da Deputación para 2020 permite usar o total dos fondos que recibe un Concello a mitigar débedas, polo que o Consistorio de Miño poderá axudarse desta partida.
