John Smith, un home de 77 anos de idade e nacionalidade inglesa que estaba a realizar o Camiño Primitivo, faleceu á primeira hora da tarde do domingo no albergue da Fonsagrada no que dispuña a pasar a noite.
O home, procedente da localidade de Salford -no noroeste de Inglaterra- viaxaba en compañía dun amigo do seu mesma nacionalidade. Segundo fontes consultadas por este xornal, parece ser que xa pola mañá comezou a sentirse mal e, de feito, especúlase coa posibilidade de que el ou o seu amigo fosen os autores dunha chamada telefónica que recibiu a PAC da Fonsagrada desde un número estranxeiro.
Ao chegar en torno ao mediodía ao albergue fonsagradino no que tiñan previsto pasar a noite, o home dispúxose a descansar. Ao redor das 16.45 horas foi cando ben o seu amigo ou persoal do establecemento no que se atopaba alertaron ao 061 ao atopalo inconsciente.
O persoal sanitario que se desprazou ata o lugar xa non puido facer nada por reanimalo e tan só certificou a defunción. A última hora da tarde o xuíz decretou o levantamento do cadáver e, seguidamente, o corpo foi trasladado ao Hula de Lugo, onde ao longo da mañá do luns lle ía ser practicada a autopsia, que deberá esclarecer os motivos do óbito.
TERCEIRO CASO. A morte repentina deste peregrino inglés é o terceiro caso de similares características que se produce na provincia en menos dun mes. O pasado 1 de outubro nun albergue de Triacastela un peregrino alemán de 70 anos de idade. A principios de setembro tamén pereceu unha sesaxenaria estadounidense que pasaba a noite en Sarria.
