Sete falecementos elevan a 815 as vítimas mortais do covid-19 en Galicia

Cinco dos mortos notificados o venres proceden de residencias de Ourense 
Complexo Hospitalario Universitario de Ourense (CHUO). EP
photo_camera Complexo Hospitalario Universitario de Ourense (CHUO). EP

Sanidade notificou este venres sete falecementos de pacientes diagnosticados con coronavirus, todos eles con patoloxías previas. Trátase de tres homes de 92, 84 e 97 anos que estaban ingresados no Hospital de Verín, unha muller de 87 anos que estaba no Chuvi, e dous homes de 77 e 92 anos e unha muller de 90 anos que permanecían ingresados no Chuo. 

Cinco deles procedían de residencias: os homes de 92 e 84 anos da Val de Monterrei e os dous homes de 77 e 92 anos e a muller de 90, da de Os Gozos de Pereiro de Aguiar.

Coas sete mortes notificadas este venres, o número de vítimas que se cobrou o covid-19 desde o inicio da pandemia elévase a 815 en Galicia. O mércores contabilizáronse seis decesos e o xoves, cinco. 

Ademais, a cifra total desde o comezo da nova normalidade ascende a 196 en Galicia. A primeira morte deste período foi a dunha muller o 7 de agosto. Antes diso, a comunidade galega encadeara case dous meses –desde o 10 de xuño– sen decesos relacionados co coronavirus.