Dúas persoas perderon a vida na mañá deste sábado en senllos accidentes rexistrados en Esgos e Ortigueira.
No primeiro deles, a vítima perdeu a vida ao chocar contra un muro mentres circulaba nunha furgoneta. O accidente ocorreu en Reboredo, dirección Chandrexa de Queixa, ao fío das 8:20 horas e foi preciso excarcerar á vítima, ao quedar atrapada no interior do vehículo.
Nada máis ter constancia dos feitos a través dunha persoa particular, desde o CIAE 112 Galicia solicitouse a intervención de Urxencias Sanitarias de Galicia-061, Garda Civil de Tráfico, dos Bombeiros de San Cibrao das Viñas, do GES do Pereiro de Aguiar e da Agrupación de Voluntarios de Protección Civil da localidade.
O segundo sinistro mortal produciuse en Ortigueira, onde unha muller de avanzada idade faleceu ao ser alcanzada por un vehículo no lugar da Senra ao fío das 6:25 horas deste sábado.
Nada máis recibir o aviso a través de Urxencias Sanitarias de Galicia-061, desde o CIAE 112 Galicia púxose a situación en coñecemento da Garda Civil de Tráfico.
A pesar dos esforzos, os servizos sanitarios nada puideron facer por salvarlle a vida.
