Un pesqueiro con base en Portonovo, o Sin Querer Dos, naufragou este mércores a 4,5 millas ao sur de Cabo Fisterra. Tres dos tripulantes faleceron e búscase a un desaparecido, todos eles naturais de Cambados. O resto da tripulación, seis mariñeiros, foi rescatada.
Nun primeiro momento creuse que o barco –anteriormente chamado Praia de Portonovo– chocara cuns baixos pero ao coñecerse a localización exacta do accidente esa opción está case descartada. Tras o sinistro, ocorrido ás 13.35 horas, os tripulantes lanzaron unha alarma e os pesqueiros próximos dirixíronse á zona para prestar a súa axuda.
Concretamente, o Hermanos Silva rescatou a dúas persoas e o Miera da Costa a catro. O primeiro barco dirixiuse a Fisterra e o segundo chegou ao porto de Muros. Catro recupéranse en hospitais de Santiago e en Cee, os dous restantes. Estes últimos poderían recibir o alta en breve. A maioría dos mariñeiros presentaba síntomas de hipotermia e só un deles recibiu asistencia por unha contusión leve.
CAMBADOS, DE LOITO. Os tres falecidos son naturais de Cambados, segundo informou o alcalde de Sanxenxo, Telmo Martín. Trátase de Teófilo Rodríguez Galiñanes, Bernardo Padín e Manuel Serén, patrón do barco que nun primeiro momento se creu que era o desaparecido. Este, en cambio, trátase do tamén cambadés Guillermo Casais.
Os corpos dos falecidos foron trasladados a terra, un polo helicóptero Helimer 401 ao aeroporto coruñés de Alvedro, e os outros dous pola embarcación Régulus ao porto de Porto do Son.
Na lonxa desta localidade instalouse un centro de recepción dos familiares da tripulación do pesqueiro. Entre os rescatados hai mariñeiros de Portonovo, Poio e catro orixinarios de África, precisaron a Efe desde a confraría de Portonovo.
Está previsto, así mesmo, que a procura con medios aéreos se retoma "ao amencer", coa incorporación do helicóptero de Salvamento Helimer 402.
Fontes desta compañía informaron a Efe de que adquiriron este buque, que antes se chamaba Praia de Portonovo, e que se atopan neste momento á espera "de noticias", sen poder concretar por agora as causas do tráxico accidente.
A firma, pioneira en conxelación de produtos de pesca, dedícase á venda ao maior de especies pelágicas e de cebos de pesca para o sector palangreiro.
O cerqueiro afundido foi construído en 1996. Segundo fontes do sector consultadas por Europa Press, o barco era "a xoia" do cerco polas súas boas condicións, a súa dotación tecnolóxica e "non lle faltaba de nada".
