Feijóo critica que as comunidades non teñan ferramentas para confinar á poboación

O presidente galego considera necesario que os gobernos autonómicos poidan aplicar esta medida en caso de detectar un brote de coronavirus
El presidente de la Xunta, Alberto Núñez Feijóo. VICTORIA RODRÍGUEZ
photo_camera O presidente da Xunta, Alberto Núñez Feijóo. VICTORIA RODRÍGUEZ

O presidente da Xunta en funcións, Alberto Núñez Feijóo, advertiu de que as comunidades autónomas non teñen ferramentas xurídicas para establecer un confinamento da poboación ante un brote de coronavirus e pediu unha reforma legal para que o Goberno ou as autonomías poidan aplicar ese tipo de medidas.

Nunha entrevista coa emisora EsRadio este martes, Feijóo reprochou que o Goberno "non fixo caso" á súa petición e a do seu partido, o PP, para modificar a Lei Orgánica de Saúde Pública de maneira que, sen ter que declarar o estado de alarma, o propio Executivo ou as autonomías poidan decidir sobre a mobilidade das persoas ante un risco sanitario.

Despois de que este luns o Govern catalán aprobase un decreto lei que permite á autoridade sanitaria, en caso dunha pandemia, impor restricións á actividade ou á mobilidade de persoas, Feijóo sinalou que as autonomías non poden facer iso.

Nestes momentos, as comunidades "non poden declarar o estado de alarma", e só poden "declarar alerta sanitaria" e "actuar en determinadas actividades económicas, pero non afectar a un dereito fundamental como é o da mobilidade".

"DEIXARSE DE BROMAS". Por iso, reclamou "deixarse de bromas" e facer unha "inmediata modificación" legal para non ver a presidentes "autonómicos que din que eles poden declarar o estado de alarma" porque non é así, e reprochou que esta cuestión en España está "un pouco desordenada".

"Neste momento, lamentablemente, non temos unha ferramenta xurídica para xestionar desde o punto de vista legal a situación de pandemia", afirmou, tras explicar que para confinar temporalmente os municipios da comarca lucense da Mariña, onde se rexistrou un brote de coronavirus, a Xunta tivo que "pedir autorización ao xulgado".

Tamén lamentou que non hai os "filtros adecuados" nos aeroportos e en vías de comunicación internacionais en España e, por iso, "pode entrar calquera", polo que pediu "algún mecanismo" para controlar e evitar a propagación de epidemias como a de covid-19.

Na súa opinión, non se pode pasar de establecer medidas de restrición de movemento a unha apertura "sen arma xurídica adecuada e seguimento sanitario mínimo", polo que España "está nunha situación de risco" e ante "ausencias legais e sanitarias", insistiu.

ALTERNATIVA POPULAR EN ESPAÑA. Feijóo tamén asegurou este martes que intentará "axudar" desde Galicia a construír unha alternativa do PP en España ao Goberno de Pedro Sánchez e Podemos, pero especificou que primeiro se debe á comunidade e despois ao partido.

Así o manifestou en sendas entrevistas en Antena 3 e Cadea Cope, nas que considerou que o PP é "a única alternativa" ao Goberno de Sánchez, mentres que nin Vox nin Cidadáns teñen un papel neste sentido.

Considerou que "nin Vox nin Cidadáns son unha alternativa en España" e advertiu contra o risco de dividir o voto entre estes dous partidos, xa que cre que isto beneficiaría á esquerda, do mesmo xeito que en Galicia.

"Se dividimos o voto, se temos moitos votos sen escano, votos a Vox e Cidadáns, e a esquerda e o nacionalismo poden gobernar", segundo Feijóo, que xa advertiu neste sentido durante a campaña electoral en Galicia, polo que dixo que iso o viron os galegos" á hora de darlle unha cuarta maioría absoluta.

Pola súa banda, insistiu en que primeiro está a súa xestión e "obrigación" cos galegos e despois a súa "achega" ao PP, do mesmo xeito que fixeron os expresidentes José María Aznar e Mariano Rajoy, ao pór "primeiro España e despois o PP".

"O meu compromiso é Galicia e, por suposto, axudar e comprometerme co partido", explicou antes de engadir que o PP vai intentar construír unha alternativa "real" ao socialismo e Podemos en España e desde a comunidade galega el vai axudala".

Puntualizou que o fará "xestionando con realidade e verdade o problema que ten Galicia" pero tamén "sendo leais" co Goberno central como "representantes ordinarios" do Estado na comunidade e porque "intentar ser útiles aos galegos é unha forma de ser útiles ao conxunto dos españois".

Crítica ao Goberno por non agradecer "de xeito contundente" a Inditex a doazón de material sanitario
O presidente da Xunta de Galicia, Alberto Núñez-Feijóo, criticou este martes ao Goberno por non agradecer "de xeito claro e contundente" a Inditex a doazón de "toneladas" de material sanitario durante a pandemia de coronavirus.

Na entrevista ofrecida á Cadea Cope, o presidente galego asegurou que, de non ser pola empresa que dirixe Amancio Ortega, España "probablemente estaría nunhas condicións" moito máis "lamentables".

Por iso, recoñeceu sentirse "sorprendido" por non escoitar a ningún membro do Executivo "agradecer a un señor que puxo os seus cargueiros a disposición para que entrasen toneladas de material cando España non era capaz de traelas".

"Cada un ten as súas formulacións na vida", apuntou Feijóo, que recoñeceu agradecer" a título persoal a Ortega a axuda, porque en Galicia non tiveron que "decidir nunca a quen se puña "ou non un respirador ou unha cama de UCI".

"Nunha semana triplicamos camas e respiradores. E unha das claves foi Inditex", asegurou, para despois lamentar que, en España, cando un "doa algo se converta nunha "persoa sospeitosa". O presidente de Galicia expresouse así en referencia ás críticas de Podemos a Amancio Ortega.

Comentarios