O presidente da Xunta de Galicia e do PPdeG, Alberto Núñez Feijóo, asegurou este venres que aínda non decidiu se optará a presidir o PP e que "o importante é que España faga un bo Mundial".
Nun acto en Sarria, o titular do Goberno galego non desvelou cales son as súas intencións en relación coa posibilidade de presentar candidatura para tomar as rendas do Partido Popular. "Non tomei a decisión. Cando a tome, anunciareina, loxicamente", expresou ante os medios de comunicación.
En relación cos apoios que está a recibir para dar ese paso adiante, Feijóo chanceou e dixo que "o importante é que España faga un bo Mundial": "Despois, seguimos falando doutras cousas", proseguiu.
Ao ser preguntado pola posibilidade de que o exministro de Asuntos Exteriores José Manuel García-Margallo estea disposto a presentar a súa candidatura só para frear as supostas aspiracións da que foi vicepresidenta do Goberno, Soraya Sáenz de Santamaría, comentou que "haberá tempo para falar diso".
"Imos tranquilizar e a sosegar os temas, haberá tempo para falar diso", engadiu Núñez Feijóo, antes de saudar ao presidente do Tribunal Constitucional, Juan José González Rivas, presente tamén en Sarria para participar na inauguración das XII Xornadas Xurídicas Román García Varela.
