O presidente do Goberno galego, Alberto Núñez Feijóo, chamou este martes "á implicación conxunta" das asociacións empresariais, dos concellos e da Xunta para que conciliar a vida laboral e familiar sexa cada vez máis fácil.
Durante unha visita á escola infantil A Galiña Azul A Veigadaña, Feijóo incidiu na importancia de que as empresas se impliquen tanto para investir en escolas infantís como para dar facilidades e flexibilidades ás nais e pais.
Ademais, apelou á colaboración das administracións locais para que todo aquel que queira construír unha escola infantil non atope trabas senón todas as facilidades posibles.
Nesta liña, asegurou que todos os axentes sociais atoparán sempre na Xunta un "aliado" cando "toque falar de conciliación". Un compromiso que, como indicou, reflíctese, por exemplo, na posta en funcionamento da nova escola infantil que, cun investimento dun millón de euros, conta cun total de 82 novas prazas públicas.
Tras precisar que con esta nova infraestrutura Mos incrementa nun 75% o número de prazas en escolas infantís sostidas con fondos públicos —pasando de 109 a 191—, Feijóo destacou que o municipio xa dispón de tres Galiñas Azuis —Coto Torrón, Porteliña e Veigadaña—, ademais dos Bonos Concilia, cos que a Xunta axuda a financiar unha praza nunha escola infantil a quen non consiga acceder a unha gardería pública.
Na súa intervención, Feijóo aseverou que a aposta do Goberno galego no que se refire á conciliación e á atención á infancia permite que, a día de hoxe, a comunidade conte con máis de 24.000 prazas en escolas infantís sostidas con fondos públicos, o dobre que en 2009, ás que sumarán en 2019 máis prazas públicas. Ademais, destacou as 46 casas niño habilitadas, a posta en marcha da Tarxeta Benvida, o Bono Concilia e as melloras no Bono Coidado, entre outras cuestións.
RETO DEMOGRÁFICO. Para rematar, afirmou que, na reunión convocada pola alta comisionada para o reto demográfico, a Xunta incidirá na necesidade de profundar conxuntamente a mellora da tendencia demográfica "porque está en xogo o futuro de Galicia, de España e tamén de Europa".
"Iremos a esta reunión non como oíntes senón como a comunidade autónoma que máis recursos destina en materia demográfica, xunto co País Vasco e Madrid. E queremos que eses recursos tamén estean financiados polo Goberno central e pola Unión Europa", indicou.
