O presidente da Xunta e líder do PP galego, Alberto Núñez Feijóo, avogou este luns por ser "maduros e non andarse con pulsos absurdos" para formar gobernos alternativos ao socialismo, ao populismo e ao nacionalismo.
Nunha entrevista na Cadea Cope, preguntado pola súa posición respecto de Vox, tras o anuncio de Ciudadanos de que non sentaría con esa formación, Núñez Feijóo dixo que a formación de Albert Rivera ten dúas alternativas. "Ou goberna cos socialistas e cometen unha fraude electoral, porque sempre dixeron que en ningún caso gobernarían co partido de Pedro Sánchez, ou a única alternativa é gobernar co PP, cando non se some pedir apoios puntuais ao partido Vox", sinalou.
En calquera caso, insistiu en que el non é partidario de que a formación de Santiago Abascal entre nos gobernos. "É a miña opinión desde Galicia, pero hei de respectar as propostas, estratexias e necesidades (do partido) en cada territorio", indicou a continuación Feijóo, que recordou que Vox non ten ningún deputado, senador nin concelleiro en Galicia polo que a súa postura é "máis fácil que a doutros compañeiros".
Preguntado por como ve o panorama de posibles pactos, tamén para formar Goberno, o presidente galego asegurou que hai "unha especie de tómbola, de poxa, na que un ten dificultades para orientarse".
Unha das formas de evitar situacións similares no futuro sería, na súa opinión, reformar a lei electoral ben mediante un "plus" á lista máis votada ben mediante unha segunda volta, unha proposta que sempre defendeu porque "non pode ser que o partido que gañe sexa o perdedor e os que perden os que gañen", dixo.
