O presidente da Xunta, Alberto Núñez Feijóo, propuxo este mércores que no debate da transferencia da AP-9 a Galicia, que debería producirse proximamente no Congreso, se inclúa un desconto do 25% para viaxes no mesmo día.
Durante a sesión de control no Parlamento galego, Núñez Feijóo expuxo tamén que sexa o Estado o que asuma con cargo aos orzamentos xerais, e non os usuarios da AP-9 coas peaxes, os "1.400 millóns de euros" correspondentes ao incremento do 1 % anual durante vinte anos pactado coa concesionaria para a ampliación.
A sesión estivo marcada polos reproches dos grupos da oposición á presenza de Núñez Feijóo na concentración do domingo en Madrid, con forzas "de extrema dereita" e que atentan contra a autonomía de Galicia, polo que tamén cuestionaron o seu compromiso co autogoberno.
O titular da Xunta defendeu o seu dereito a manifestarse onde queira e con quen queira sen pedir permiso a ninguén, xa que el non é Pedro Sánchez, e asegurou que o fixo en defensa da Constitución, do Estatuto de Autonomía e do autogoberno galego.
Reivindicou a súa xestión durante os anos da crise, cando "xestionou mellor" que o Goberno as competencias de Galicia e chegou a asegurado que non lle importaría que o recordasen como o presidente "que mantivo a autonomía en pé", xa que tan só País Vasco, Navarra e Galicia evitaron ser "intervidas" para pagar as súas facturas.
Por este cumprimento, ademais, reclamou que o Goberno ingrese a Galicia "os 170 millóns de euros que lle debe" (85 millóns por 2018 e outros tantos polo ano 2019) polo cumprimento do déficit e as regras de gasto.
Para os grupos da oposición, a xestión de Núñez Feijóo, con todo, evidencia que houbo "recortes" tanto en materia social como de autogoberno.
O portavoz de En Marea, Luís Villares, incidiu en que Núñez Feijóo acudiu a manifestarse "coa dereita antiautonómica e reaccionaria", entre outros cualificativos.
"Casado e Abascal chamárono a filas e vostede desfilou coa Falanxe, Fogar Social e Vox", asegurou Villares, que criticou tamén que o PP, na súa interpretación, se situase no Parlamento galego "ao lado do machismo e non da igualdade"
Núñez Feijóo reprochou que Villares, maxistrado en excedencia, xa non milite na Constitución, cuestionou que o "grupo bolivariano" de En Marea queira dar leccións de dereitos humanos cando "defenden a Maduro en Venezuela" e advertiu a Villares de que chamar "falanxistas" ao PP supón "insultar á maioría de Galicia" que vota a este partido.
O portavoz do PSdeG no Parlamento galego, Xoaquín Fernández Leiceaga, propuxo a Núñez Feijóo un acordo "razoable e sensato" entre os grupos parlamentarios para ampliar o autogoberno galego "sen divisións, dentro da Constitución e do Estatuto".
"Temos unha lista non pechada, flexible, dunhas trinta competencias que xa están nos Estatutos doutras comunidades (...) ¿Cando será o momento se non é agora?", concluíu.
Núñez Feijóo afirmou que non recibirá leccións de autogoberno por parte do PSOE e tachou de cortina "de fume" esta proposta, "de cambio de tema e de conversación" por parte dos socialistas nun momento no que se debaten os orzamentos do Estado que establecen un aumento de investimento real en Cataluña do 57 por cento e "unha diminución real en Galicia do 26 por cento".
Ana Pontón, portavoz nacional do BNG, cuestionou novamente a Núñez Feijóo polas súas políticas sanitarias e tamén censurou a súa presenza "retratado en Madrid de ganchete coa ultradereita antigaleguista, fascista e machista" mentres "miles de galegos defendían na rúa a sanidade pública".
"Convénzase, os problemas da sanidade pública non se van a solucionar nin con mentiras, nin con parches nin con censura na TVG", proclamou.
"Que me dea vostede leccións de con quen me manifesto é sorprendente. Eu estou a favor da Constitución e do Estatuto, e vostedes en contra (...) Non me verá nunca á beira de Otegi, Bildu e ERC", replicou Núñez Feijóo, en alusión á candidatura conxunta de ERC, Bildu e BNG para as eleccións europeas de maio.
O presidente da Xunta reprochou a Pontón a súa "obsesión" por "desprestixiar" a sanidade pública galega e instouna a condenar o ataque sufrido por algunhas ambulancias durante a folga neste sector.
