Un bombeiro foi evacuado na madrugada deste xoves polos servizos sanitarios en Vigo logo de sufrir un accidente mentres cortaba unha árbore, que lle caeu enriba, no lugar de Fragoselo. Atendendo á información do 112 Galicia, o equipo médico que acudiu ata o lugar dos feitos indicou que sufriu "lesións de diversa consideración".
Sobre as 6.00 horas, Urxencias Sanitarias de Galicia-061 avisou ao 112 do incidente. Recibida a alerta, a central de urxencias informou do ocorrido á Policía Nacional e Local. O 061 enviou ao lugar unha ambulancia de soporte vital básico que levou ao centro Fremap ao bombeiro ferido, J.L.C.G., de 58 anos.
Segundo informa a TVG, o bombeiro estaba a podar unha árbore que se atopaba en aparente mal estado para previr accidentes.