Un ciclista resultou ferido e foi trasladado a un centro hospitalario tras ser atropelado por un turismo na mañá deste martes na cidade de Vigo.
Atendendo á información do 112 Galicia, o ciclista foi alcanzado sobre as 8.00 horas por un vehículo cando circulaba pola rúa Sanjurjo Badía.
Foi un particular quen chamou ao 112 Galicia para informar dos feitos e indicou que o ciclista necesitaba asistencia sanitaria tras ser atropelado. O Centro Integrado de Atención ás Emerxencias (CIAE) solicitou a intervención de Urxencias Sanitarias de Galicia-061 e dos axentes da Policía Local. Ademais, avisouse aos Bombeiros de Vigo e a Protección Civil.
Ao lugar o 061 enviou dúas ambulancias para atender a dous homes. En concreto, J.C.G., de 35 anos, foi levado nunha ambulancia de soporte vital avanzado ao Hospital Álvaro Cunqueiro. Mentres, unha ambulancia de soporte vital básico cun equipo sanitario de Atención Primaria de Vigo trasladou ao Hospital Povisa a J.M.C.A., de 53 anos.
