Unha trasnada de adolescentes a punto estivo de custarlle a vida a un mozo de 15 anos que colleu as chaves dun dos coches do negocio de compravenda do seu pai e, acompañado por un amigo da súa mesma idade, púxose ao volante por unha serie de pistas secundarias do Porriño onde acabou estrelando o vehículo contra unha pedra de grandes dimensións. O impacto foi frontal e moi aparatoso, aínda que o feito de que, dentro da súa temeridade, os rapaces levasen o cinto de seguridade, evitou consecuencias tráxicas. O condutor foi ingresado no hospital Álvaro Cunqueiro de Vigo con feridas graves, aínda que non corre perigo, mentres que o copiloto foi atendido de lesións leves.
Os feitos comezaron á primeira hora da tarde do martes na zona urbana do Porriño, onde o proxenitor do pequeno condutor posúe un coñecido negocio de venda de automóbiles de ocasión. De alí colleu o fillo as chaves dun Ford Focus cuxa venda, segundo algunhas fontes, estaba xa pechada cun cliente. Subiuse ao coche co seu colega e puxo rumbo aos camiños de terra da Vaqueira, unha zona moi pouco transitada e onde abundan pedras ás marxes da estrada por estar moi próxima a unha canteira.
Contra unha das rochas foi a impactar o vehículo no que viaxaban os dous mozos tras saírse previamente da calzada pola marxe esquerda. Ocorreu ao redor das 18.30, e aínda que a Garda Civil abriu unha investigación para esclarecer as circunstancias do accidente, xa se baralla que a inexperiencia do condutor e, probablemente, unha velocidade excesiva para a vía poidan estar detrás do sinistro.
SORPRESA NO 061. O 112 recibiu a chamada dun particular alertando do sucedido e enviou ao lugar indicado unha patrulla da Garda Civil e unha ambulancia medicalizada do 061. Tras a sorpresa duns e outros ao identificar un menor de 15 anos como o condutor, procederon a trasladalo ao Cunqueiro, á vez que os axentes instruíron un atestado no que o investigan por un delito contra a seguridade viaria.
