O exalcalde socialista da Coruña Francisco Vázquez considerou este mércores unha "vergoña" que o pleno da Coruña aprobe unha moción para revogar o título de Fillo Adoptivo ao expresidente da Xunta Manuel Fraga Iribarne, mención honorífica que recibiu en 1968 do consistorio coruñés.
A moción foi aprobada o pasado luns cos votos do PSOE, BNG e a Marea Atlántica, mentres que o PP se opuxo. Para Francisco Vázquez, que o PSOE —o partido ao que pertenceu e representado como alcalde e como embaixador de España no Vaticano— apoie esta iniciativa supón para el que rompeu "co que representou durante toda a transición", segundo informa a cadea Cope nun comunicado.
O exrexedor durante máis de dúas décadas da Coruña abundou que tanto a retirada do título a Manuel Fraga como a Laureano López Rodó, que tamén foi ministro con Franco, é "unha ignominia". Na súa opinión, esta iniciativa supón unha "manifestación máis do totalitarismo exacerbado que representa o contido da Lei de Memoria Histórica que está en vigor, que se apropia do relato histórico con criterios partidistas e determina quen son os bos e os malos".
Ademais, cre que esta lei "rompe co alicerce da transición que é a reconciliación nacional e volve dividir á sociedade española".
