Os funcionarios da Administración de Xustiza de Galicia votan xa este venres se apoian esta oferta que expuxoa Xunta para concluír o paro indefinido iniciado o 7 de febreiro, proposta que conta co respaldo de catro dos sete sindicatos que forman parte do comité de folga.
A votación estase desenvolvendo con moita tensión e nos xulgados de Vigo houbo apupos e berros de "cobardes", "vendidos" ou "traidores" aos representantes de CCOO, UGT, USO e CSIF. De feito, tiveron que intervir as forzas de seguridade e o comezo das votacións atrasouse case tres horas.
Unha reunión celebrada o xoves na Escola Galega de Administración Pública terminou co compromiso destes catro sindicatos de levar aos traballadores a oferta que fixo pública a Xunta o mércores 18 de abril.
Fronte á postura destas catro agrupacións sindicais, que optaron por non defender publicamente a súa postura, situáronse Alternativas na Xustiza-CUT, STAJ e CIG, que mantiveron a última posición pública do comité de folga ante unha oferta que cualificaron de soga "ao pescozo". A reunión, de feito, terminou con insultos e reproches entre os dous bandos que existen dentro do comité de folga.
Os catro sindicatos –que segundo o vicepresidente da Xunta, Alfonso Rueda, negociaron cos representantes do Goberno galego á marxe dos demais integrantes do comité de folga– chamaron este venres –tras oitenta días consecutivos de folga indefinida– a votar, nos xulgados das sete cidades galegas, a todos os funcionarios.
Uns 2.700 traballadores poden acudir ás urnas ata as 17.00 horas para responder á seguinte pregunta: "¿Aceptas a proposta da Xunta e a desconvocatoria da folga?".
As papeletas ofrecen escoller o si, que se recibe a maioría dos votos acabará coa folga, ou o non, que apoiaría a última posición pública do comité de folga, agora só defendida por tres sindicatos.
A MELLORA. A aceptación da oferta do Executivo autonómico situaría con efecto inmediato aos funcionarios galegos, segundo unhas táboas difundidas polos sindicatos convocantes da votación, en noveno posto -entre doce comunidades e un territorio do Ministerio de Xustiza- no caso dos xestores, sétimo no dos tramitadores e sexto nos corpos de auxilio.
En 2019, os xestores avanzarían unha posición ata a oitava, mentres que tramitadores e auxilios serían cuartos; e en 2020, xa con toda a subida proposta aplicada, os xestores serían sextos e os demais continuarían na cuarta praza.
A cantidade final da subida, aplicada nun 50% este ano, un 30% en 2019 e o 20% restante en 2020, foi de 135 euros ao mes para xestores, 127 para tramitadores e 122 para corpos de auxilio; ademais de 140 para médicos forenses.
A Xunta incluíu unha cláusula que garante que os funcionarios galegos nunca volverán caer por baixo da sexta posición.
O comité de folga defendera que era necesario manter as posicións que establecía o acordo, pois iso garantiría as revisións periódicas mentres que a formulación actual impide as reclamacións ata o momento no que os funcionarios caian por baixo da sexta praza.
