Gago e Touriñán debaten en ‘Diálogos de plástico’ sobre o impacto deste material na vida cotiá

O faladoiro, organizado pola Unión de Consumidores de Galicia e Mercadona na Sede Afundación de Santiago, gozou dunha grande acollida 
 
Imaxe do evento 'Diálogos de plástico'. CEDIDA
photo_camera Imaxe do evento 'Diálogos de plástico'. CEDIDA

Ciencia e humor, esas foron as pezas principais nas que se apoiou o faladoiro Diálogos de plástico. Unha actividade que a Unión de Consumidores de Galicia (UCGAL) e Mercadona celebraron este xoves na Sede Afundación da capital galega coa finalidade de debater sobre unha das problemáticas medioambientas que máis preocupan: os  plásticos. 

O investigador do Instituto Español de Oceanografía e experto en lixo mariño, Jesús Gago, e o recoñecido actor galego, Xosé Antonio Touriñán, foron os protagonistas desta conversa, mediada polo divulgador científico Manuel Vicente, director e presentador do programa Efervesciencia da Radio Galega.  

Durante a hora que durou o faladoiro abordáronse varias das cuestións máis relevantes vinculadas ao uso dos plásticos na vida cotiá. Desde a súa presenza nos produtos que se consomen diariamente, que facer con aqueles que son dun só uso, o sistema de envases retornables, os microplásticos ou a reciclaxe, ata a contaminación dos mares e dos océanos a causa deste material. Temas tratados desde a óptica dun estudoso na materia como Gago e a visión da persoa de a pé por parte de Touriñán.  

Un momento do evento. CEDIDA

Dun xeito distendido e divertido convidóuselle ao público a reflexionar sobre esta problemática e as accións que poden levar a cabo para mudar a situación, mantendo sempre presente o principal propósito: trazar a fórmula máis intelixente de convivir cos plásticos. 

O faladoiro Diálogos de plástico foi moi ben acollido polos asistentes e poderá gozarse de novo este mércores 27 de novembro no programa Efervesciencia, que emitirá parte do contido. 

Esta actividade enmárcase no compromiso que a UCGAL e Mercadona adquiren coa defensa e difusión dos Obxectivos de Desenvolvemento Sostible (ODS) e o fomento da educación ambiental e científica. Para a súa posta en marcha contouse coa colaboración do programa Efervesciencia da Radio Galega e o Instituto Español de Oceanografía. 

Comentarios