Galicia arrinca a última semana con estado de alarma en vigor debido á pandemia de coronavirus cun descenso dos novos contaxios a 103, tras manterse varios días a semana pasada por enriba dos 200. Tamén descenden os casos activos, ata os 3.030, mentres que os pacientes hospitalizados mantéñense en 214.
Atendendo aos datos actualizados este luns pola Consellería de Sanidade, descenderon a 50 os pacientes ingresados en Uci —un menos— e soben a 164 os que permanecen noutras unidades —un máis—. Por áreas sanitarias, a presión hospitalaria alíviase nas da Coruña, Vigo, Ourense e Lugo, mentres que aumenta nas de Ferrol, Santiago e Pontevedra.
En canto aos casos activos, tras o lixeiro incremento deste domingo, volveron a descender e sitúanse en 3.030, que son 76 menos, ao rexistrarse máis altas (179) que contaxios (103) e non haber falecidos na última xornada.
A taxa de probas PCR que dan positivo segue por baixo do 2%
As infeccións activas redúcense en seis das sete áreas sanitarias: Vigo (-39); A Coruña (-15); Lugo (-14), Ferrol (-4), Ourense (-3) e Santiago (-1), mentres que na de Pontevedra mantéñense sen cambios. Así as cousas, a de Vigo continúa á cabeza con 906 casos activos; seguida da Coruña, con 695; Pontevedra, con 491; Santiago (363); Ourense (266); Lugo (214) e, á cola, Ferrol, con 95.
MENOS CONTAXIOS. Esta última semana co estado de alarma en vigor arrinca en Galicia cun descenso dos novos contaxios ata os 103, dos que 86 detectáronse por PCR. Do total, 27 corresponden á área da Coruña; 20 á de Vigo; outros 20 á de Pontevedra; 10 á de Santiago; cinco á de Ourense; tres á de Lugo; e un á de Ferrol.
Desde o inicio da pandemia realizáronse en Galicia 2.072.214 probas PCR, 6.418 máis que as contabilizadas ata o domingo. En canto á taxa de positividade —porcentaxe de infeccións por test PCR realizados—, segue por baixo do 2% cun 1,6%. Deste xeito, continúa sen superar o 5% que a Organización Mundial da Saúde (OMS) fixa para dar por controlada a pandemia.
En Galicia faleceron 2.390 persoas con covid desde o inicio da alerta sanitaria. Os pacientes que superaron o virus son 117.220.
