jueves. 26.11.2020 |
El tiempo
jueves. 26.11.2020
El tiempo

Galicia bate o pico de casos activos da primeira onda e suma nove mortes

Complexo Hospitalario Universitario de Ourense (CHUO). EP
Complexo Hospitalario Universitario de Ourense (CHUO). EP
Tres dos falecidos este xoves son usuarios de residencias 

Galicia superou a cifra de casos activos de covid-19 da primeira onda, ao rexistrar 5.675 o pasado mércores, por encima dos 5.481 do 8 de abril e este xoves, día en que entraron en vigor novas limitacións, rexistráronse nove mortes. 

En concreto, os falecidos son un home de 95 anos e outro de 71 que se atopaban ingresados no Complexo Hospitalario Universitario de Santiago; así como unha muller de 60 anos falecida no Complexo Hospitalario de Pontevedra. 

No Hospital de Ourense, pola súa banda, producíronse cinco mortes: a de catro homes de 92, 81, 80 e 76 anos e a dunha muller de 87, mentres que na Clínica Santa Teresa de Ourense faleceu un home de 92 anos. 

Tanto esta última vítima como unha das do Chuo procedían da residencia Os Gozos, de Pereiro de Aguiar, mentres que outro dos falecidos no Hospital de Ourense estaba vinculado á Virxen Branca de Ourense. 

CONTAXIOS Á ALZA. Os contaxios diarios, segundo recolle a web específica habilitada pola Xunta, van á alza, pois son 461 nun período de 24 horas, ata vinte máis que na xornada precedente, e a cifra de hospitalización -317 en planta e 47 en UCI- experimenta outra lixeira subida. 

As PCR realizadas ata a data son 609.516, e, do global, 6.541 máis nas últimas 24 horas. 

O 8 de abril, cando a comunidade anotara aquel máximo, eran 2.300 as PCR realizadas, pois nese momento a capacidade diagnóstica distaba da actual. 

O impacto da pandemia do coronavirus nas escolas infantís e centros de educación non universitaria de Galicia mantén a súa tendencia expansiva e xa se contabilizan 639 casos, 31 máis, o que se traduce en 23 aulas pechadas, catro máis. 

Tamén aumentaron os centros educativos nos que se contabiliza polo menos un positivo por covid-19, concretamente 359, dez máis que no anterior reconto. 

En cambio, é só un centro, o punto de atención á infancia de Boborás, o que permanece pechado, ao reabrir a escola infantil María Ana de Celanova. 

Os falecementos desde o inicio da pandemia son 856, tras sumar os nove deste xoves, que suceden aos once do mércores, outro día tráxico. 

Galicia soamente permite, durante polo menos dúas semanas, reunións públicas ou privadas cun máximo autorizado de cinco persoas e na capital, Santiago de Compostela, unicamente se conviven baixo o mesmo teito. O mesmo ocorre no Milladoiro, un núcleo poboacional da veciña localidade coruñesa de Ames. 

Galicia bate o pico de casos activos da primeira onda e suma nove...
comentarios