Galicia baixa dos 2.000 casos activos por primeira vez desde agosto

Os datos da pandemia por covid-19 seguen caendo en Galicia, onde o número de persoas infectadas ou enfermas é 1.945, 107 menos que un día antes, e os pacientes ingresados en centros hospitalarios públicos baixa ata os 71. Non había unha cifra tan baixa de casos activos desde o pasado mes de agosto.

Segundo o Sergas. o venres había nas unidades de críticos de hospitais galegos 13 enfermos de covid-19, dous menos que o día anterior, mentres que en planta tamén descenden as persoas ingresadas ata as 58, vinte e cinco menos.

Desde o inicio da pandemia na comunidade galega contaxiáronse 127.300 persoas, das que se curaron 122.954, e faleceron 2.426, dúas delas notificadas nas últimas horas.

O número de probas PCR realizadas ata a tarde do venres ascenden a 2.274.739, das que 5.481 foron nas últimas horas. En canto ás probas de antígenos, a cifra alcanza as 542.858.

De todas as áreas sanitarias de Galicia, Vigo segue sendo a máis afectada, con 534 pacientes con infección activa, 66 menos que onte; mentres que o resto mantéñense estables ou reducindo as cifras de incidencia.

No resto de áreas sanitarias, A Coruña ten 342 persoas infectadas ou enfermas (-14), e as áreas de Lugo, Pontevedra e Santiago manteñen de xeito notorio as súas cifras á baixa.

Así, a área de Lugo, tras varios días consecutivos de aumento de casos logrou reducir nas dúas últimas xornadas a cifra de pacientes con infección activa, que queda en 245 (-5); e as de Pontevedra 222 (-10) e Santiago 335 (-23) consolidan a súa liña descendente.

Na área de Ourense redúcense de 168 a 159 os casos (-9); e tamén na área de Ferrol cae o número de pacientes infectados ata os 108 (-6).