Galicia rexistrou nas últimas 24 horas un novo repunte nos casos de coronavirus detectados, con 221 positivos, co que a cifra de casos activos volveu a crecer, ata os 4.350. Ademais, rexistrouse un novo falecemento, o dun octoxenario en Ourense, co que as mortes vinculadas co covid-19 na comunidade sitúanse en 721.
Atendendo ao balance publicado este martes pola Consellería de Sanidade, Galicia ten este martes 4.350 casos activos de coronavirus, 46 máis que a xornada anterior, e déronse 17.167 altas, 172 máis que hai 24 horas.
Desde o parte anterior rexistráronse tres falecementos, o último deles un home de 82 anos que se atopaba ingresado no Complexo Hospitalario Universitario de Ourense e presentaba patoloxías previas. A última hora do luns notificouse tamén a morte de dous homes de 88 anos, un en seguimento domiciliario na área da Coruña e outro ingresado no Clínico de Santiago.
Con iso, a cifra de falecidos vinculados á pandemia desde o seu inicio en Galicia ascende a 721 e, desde o comezo da 'nova normalidade', son xa un centenar.
Tamén se incrementaron os pacientes con covid-19 hospitalizados —hai tres máis que este luns— e sitúanse en 247, deles 32 seguen ingresados na unidade de coidados intensivos (Uci).
SOBEN EN PONTEVEDRA E VIGO. Por áreas sanitarias, a da Coruña volve rexistrar un importante descenso na cifra de casos activos, 34 menos, ata os 1.114. Tamén descenden os de Lugo, neste caso dous menos, ata os 687.
O resto de áreas experimenta este martes un incremento na súa cifra de casos activos. Este incremento é especialmente significativo en Pontevedra, que rexistra 35 casos máis, ata os 702, e en Vigo, con 32 máis, ata os 489. A área sanitaria de Santiago-A Barbanza incrementa dous casos activos, ata 627 e a de Ferrol sobe tres, ata os 180.
A cifra de PCR realizases desde o inicio da pandemia en Galicia é de 434.864, o que supón 3.783 probas nas últimas 24 horas.
Ademais, confirmáronse, con datos ata o lunes, un total de 161 positivos en centros educativos en Galicia e pecharon 35 aulas.
