Galicia entrou na chamada nova normalidade, a que implica ter menos de 25 casos por cada 100.000 habitantes a dúas semanas, situación na que só hai outra comunidade: Asturias. Neste contexto, a Xunta presentou este martes o novo protocolo para xestionar esta etapa, aliviar restricións e atender posibles gromos, un modelo no que perderá peso a incidencia acumulada como un dos factores determinantes para tomar decisións.
Os datos actualizados este martes pola Xunta revelan que Galicia ten 715 casos activos de coronavirus —24 menos que un día antes—, nunha xornada na que hai 24 contaxios novos, que son catro menos que o día anterior.
Ata as 18.00 horas do luns había nos hospitais galegos 51 persoas ingresadas con covid-19, cinco menos. Trece delas están na Uci. Galicia é a comunidade coa incidencia máis baixa neste indicador, cun 1,34% de camas de coidados intensivos ocupadas por pacientes con coronavirus, fronte a unha media do 6,9% no conxunto de España.
Vigo non sumou ningún positivo en 24 horas, igual que Ferrol
Desde o inicio da epidemia en Galicia contaxiáronse 182.405 persoas, das que se recuperaron 179.085 e faleceron 2.639.
Segundo os datos divulgados polo Ministerio de Sanidade, Galicia ten unha incidencia de 22,9 casos por cada 100.000 habitantes nos últimos catorce días, mentres que a media de España é de 54,1 casos.
Por áreas sanitarias, a de Vigo non rexistrou ningún caso novo por primeira vez en moitos meses, do mesmo xeito que a de Ferrol, que conseguiu non sumar ningún contaxio novo en varias ocasións nas últimas semanas.
O resto das áreas continúan co seu descenso, salvo a de Lugo, que rexistra dous casos positivos máis e a da Coruña, que nesta xornada queda cos mesmos casos activos que o día anterior.
