Galicia flexibiliza os criterios de titulación

Galicia flexibiliza os criterios de titulación. Pasar de curso, a avaliación continua e as accións de reforzo serán as directrices que marcarán este terceiro trimestre na maioría das etapas educativas. 

No entanto, a esixencia será maior en bacharelato, onde o número de suspensos si será determinante para obter o título, aínda que se recoñecen excepcións no caso de que o centro o considere oportuno e terase en conta a evolución do alumno e a adquisición de competencias. 

Así se desprende das instrucións elaboradas pola Consellería de Educación, Universidade e Formación Profesional e remitidas ás direccións dos centros educativos, a partir das directrices avanzadas polo ministerio do ramo na última conferencia sectorial coas comunidades autónomas. 

"Os centros e o profesorado adaptarán o sistema de avaliación do alumnado, co obxectivo prioritario de que os alumnos e as alumnas non perdan o curso e poidan continuar avanzando na súa formación, tendo en conta de xeito especial a situación dos estudantes máis vulnerables", apunta o departamento autonómico no novo regulamento. 

Galicia permitirá titular sen ter en conta os suspensos, pero será máis esixente en bacharelato

O documento da Xunta achega directrices por etapas educativas, cunha indicación común a todas: a flexibilización dos criterios de avaliación. En termos xerais, a avaliación a partir da suspensión das clases presenciais será continua e terá carácter diagnóstico e formativo. Deste xeito, considerarase o conxunto do curso para valorar os avances do alumnado e a necesidade ou non de planificar medidas de recuperación. 

Entre as instrucións achegadas, atópanse aquelas destinadas a realizar a avaliación e a titulación do alumnado de forma telemática, na liña dos parámetros avanzados pola ministra Isabel Celaá. Os centros emitirán un informe individual por alumno, impulsarán o desenvolvemento de competencias clave e acentuarán as tarefas centrándose no traballo realizado nos dous primeiros trimestres. A repetición será excepcional e o obxectivo será favorecer a promoción do alumnado, de modo que non poderá verse prexudicado polas consecuencias da crise e o parón das clases á hora de titular.

Así mesmo, os centros impulsarán plans de reforzo e recuperación de cara ao próximo curso e a adaptación do currículo e as actividades centrándose, especificamente, no alumnado máis atrasado, ademais de adoptarse as medidas necesarias de atención á diversidade na programación do próximo ano.

As instrucións da Xunta priman a promoción e a avaliación continua no terceiro trimestre

INFANTIL

En educación infantil flexibilizaranse os criterios de avaliación e vixiarase o desenvolvemento e a evolución dos pequenos ao longo do curso. 

PRIMARIA

Atendendo ao texto, ademais de flexibilizarse os criterios de promoción en todos os cursos, a repetición considerarase unha medida "de carácter excepcional".

O informe individual será de especial "relevancia" no caso dos alumnos que cursasen sexto e que accederán a Eso. Iso si, terá "carácter informativo e orientador", para detallar as aprendizaxes pendentes, e que "deberán ser obxecto de tratamento" o próximo ano escolar.

SECUNDARIA

Tamén nesta etapa a repetición será unha medida excepcional, que se adoptará, en todo caso, de xeito colexiado polo equipo docente en función da evolución académica durante o período previo á suspensión da actividade lectiva presencial". En caso de pasar de curso con materias pendentes haberá que matricularse de novo nelas.

Os centros poden realizar actividades de avaliación do terceiro trimestre, que en calquera caso terán "carácter diagnóstico".

En canto ao título, o texto de Educación detalla que se flexibilizarán os criterios para obtelo e que non se terán en conta as limitacións que afecten ao número de materias pendentes.

A avaliación final de bacharelato deberá ser antes do 9 de xuño

BACHARELATO

Polo "carácter excepcional" da repetición, adoptarase tamén de xeito colexiado polo equipo docente. Así é que se poderá pasar de curso con máis de dúas materias pendentes se o decide a xunta de avaliación.

As condicións son algo máis esixentes para o segundo curso de bacharelato, xa que "para obter o título será necesaria, con carácter xeral, a avaliación positiva en todas as materias dos dous cursos" desa etapa. Aínda así, os centros poderán flexibilizar, de xeito excepcional, os criterios de obtención do título cando, a xuízo do equipo docente, o alumno adquirise suficientemente os obxectivos xerais da etapa que lle permitan continuar o seu itinerario académico.

A avaliación final de bacharelato deberá realizarse antes do 9 de xuño, e na primeira semana de setembro na convocatoria extraordinaria. 

FORMACIÓN PROFESIONAL

Flexibilízanse tanto os criterios de promoción como os de titulación dos ciclos. As instrucións prevén que, no caso de que no primeiro curso dun estudo non se abordasen aprendizaxes esenciais, os centros poderán, por exemplo, autorizar a súa "localización" noutro módulo do segundo curso.